O‘zbekiston yoshlar terma jamoasi safida Osiyo chempioni bo‘lgan futbolchi shu vaqtga qadar ukasining ism-sharifida o‘ynab kelgani va aslida 2 yoshga katta ekani ma’lum bo‘ldi

“Yig‘ilishda 1995-yilda tug‘ilgan G‘ofurov Anvarjon Husanboy o‘g‘lining vakili sifatida O‘zbekiston futbolchilari uyushmasi raisi Kamoliddin Murzoyev futbolchi haqiqatda ham bundan bir necha yil avval, ayrim o‘ziga bog‘liq bo‘lmagan sabablar tufayli o‘zining ma’lumotlarini, aniqrog‘i pasportdagi ismi va familiyasini ukasi – 1997-yilda tug‘ilgan G‘ofurov Husniddin Husanboy o‘g‘li nomiga rasmiylashtirgani va aynan ushbu ism va familiya ostida faoliyatini davom ettirganini ta’kidlab o‘tgan.

Jinoyat ishlari bo‘yicha Farg‘ona viloyat Buvayda tuman sudining 2020-yil 3-mart kunidagi hukmiga ko‘ra G‘ofurov Anvarjon Husanboy o‘g‘lini ukasi G‘ofurov Husniddin Husanboy o‘g‘li bilan bir-birlarining shaxsiy ma’lumotlari va ism-familiyalarini almashtirgan holda rasmiylashtirilgan fuqarolik pasportlari belgilangan tartibda yo‘q qilinib, ularning haqiqiy shaxsiy ma’lumotlari va ism-familiyalari bo‘yicha fuqarolik pasportlari rasmiylashtirilishi ta’minlangan”, — deyiladi O‘FA bayonotida.

“Qo‘mita ushbu vaziyatni o‘rganish davomida, futbolchi haqiqatda ham bunga o‘zi istamagan holda o‘sha vaqt faoliyatini boshlagan murabbiylari va ota-onasi qistovi bilan rozilik bergan degan xulosaga kelgan.

Futbolchilarning maqomi va o‘tishi bo‘yicha qo‘mitasi tomonidan G‘ofurov Anvarjon Husanboy o‘g‘liga uning haqiqiy shaxsiy ma’lumotlari va ism-familiyasi asosida rasmiylashtirilgan fuqarolik pasporti bo‘yicha imzolangan mehnat shartnomasi va boshqa hujjatlarini PFLdan ro‘yxatdan o‘tkazilishiga ruxsat berish to‘g‘risida qaror qabul qilingan. Shuningdek, mazkur qaror nusxasi G‘ofurov Anvarjon Husanboy o‘g‘liga nisbatan jarima intizomiy jazo chorasini qo‘llash masalasini ko‘rib chiqish uchun O‘FA Tartib-intizom qo‘mitasiga taqdim etilishi belgilandi”, — deya qo‘shimcha qilinadi.