O‘zbekiston Professional futbol ligasi bir nechta holat bo‘yicha reglament buzilishi holatini qayd etib, Tartib-intizom qo‘mitasiga taqdim etgan.
PFL O‘zbekiston Futbol Assotsiatsiyasi Tartib-intizom qo‘mitasining navbatdagi yig‘ilishida to‘g‘ridan-to‘g‘ri qizil kartochkalardan tashqari yana qator masalalar ko‘rib chiqilishini ma’lum qilgan. Quyida ularning ayrimlariga to‘xtalib o‘tilgan:
“Buxoro”
Pro Liga ilk turidan o‘rin olgan “Sho‘rtan“ — “Buxoro” o‘yinida mehmon klub qaydnomani to‘ldirishni yarim soatga kechiktirgan. Vaholanki, reglamentda mazkur masala aniq yozib qo‘yilgan. Talab tushunarsiz sababga ko‘ra bajarilmaganidan kelib chiqib, “Buxoro” klubi jarima to‘lashi belgilangan. PFL klub bunday mas’uliyatsizlik sababini ko‘rib chiqishi hamda o‘z ishiga mas’uliyatsizlarcha yondoshgan ishchisiga nisbatan chora ko‘rish vakolatiga ega.
“Mash’al”
“Mash’al” futbol klubi PFL tomonidan o‘tgan mavsum stadion perimetri bo‘ylab joylashgan reklama shitlari masalasida bir necha bor ogohlantirilganiga qaramay, 2024-yilgi mavsumni ham xuddi shunday kamchiliklar bilan boshlagan. Buning uchun klubga jarima qo‘llanilishi belgilangan.
“Andijon”
“Andijon” futbol klubi “Bobur arena” stadioni mezbonlik qilgan “Bunyodkor”ga qarshi o‘yinda elektron reklama shitlari bilan bog‘liq Liga talabini bajarmagan. Klubning Andijon viloyatidagi ayrim tashkilotlar bilan muammosi Ligaga ma’lum ekanligi ta’kidlanib, ushbu muammolar Liga muammosiga aylanmasligi shartligi eslatib o‘tilgan.
“Dinamo”
“Dinamo” murabbiylar shtabidan joy olgan Andrey Pyatnitskiy OKMK klubiga qarshi o‘yin vaqtida elektron sigareta chekkani uchun jarimaga tortiladi. PFL bayonotida har qanday mutaxassis Reglamentga amal qilishga majbur ekanligi aytilgan.
“Neftchi”
Superliga 3-turidan o‘rin olgan “Neftchi” — “Metallurg” uchrashuvi davomida futbol muxlislari mehmonlar zaxira o‘rindig‘i tomon suvli idishlar uloqtirgan. Ulardan biri murabbiylardan biriga borib tekkan. Shuningdek, “Neftchi” g‘alaba golini urib, uni nishonlayotgan vaqtida qarama-qarshi tarafdan suvli idishlar stadionga uloqtirilgan. Bu kabi holatlar Farg‘onada o‘tgan mavsum ham kuzatilgan. PFL “Neftchi”ning faol va fidoyi muxlislarini hurmat qilgan holda ularrni yon-atrofidagi aqlsiz kishilarni tiyishga chaqirgan. Holat uchun “Neftchi” jarimaga tortiladi.
“Paxtakor”
Superliga 2-turidan o‘rin olgan “Paxtakor” — “Nasaf” uchrashuvi vaqtida media tribunadan mazkur hududga kirish ruxsatini beruvchi akkreditatsiyaga ega bo‘lmagan qator shaxslar o‘rin olgan. Bu esa tabiiyki, OAV vakillari faoliyatiga xalaqit beradi. Holat uchun “Paxtakor” jarima to‘lashi belgilangan.
5 ta klub jarima to‘laydi
Futbolchining funksional holatini masofadan turib monitoring qilish imkonini beruvchi moslama ikki mavsumdan buyon Superliga qaydnomasidan o‘rin olgan har bir futbolchida bo‘lishi, uchrashuvdan keyin klub tahlil natijalarini O‘FA uchun taqdim etishi kerak. O‘tgan mavsum o‘z ishiga mas’uliyatsiz yondoshgan klublar buning uchun katta jarimaga tortilgandi. Biroq joriy mavsumning dastlabki uch turida ham bu kabi holatlar kuzatildi. Reglamentdagi talab yangi bo‘lmagani, klublarda vaziyatni hal qilish uchun 2 yildan ortiq vaqt bo‘lganini inobatga olib, bu borada hech qanday izoh qabul qilinmaydi va klublar jarima to‘laydi. Bular: “Surxon”, “Andijon”, “Dinamo”, “Nasaf” va “Neftchi”.
“Shuningdek, yangi qoidaga ko‘ra 3 holat bo‘yicha olingan ogohlantirishlar jarimaga sabab bo‘ladi. O‘tgan uch tur davomida hakam ishiga aralashish holatlari 17 marta, vaqtni cho‘zish holati 7 marta va simulyatsiya 3 marta ogohlantirishga sabab bo‘lgan. Mazkur holatlarning barchasi uchun tegishli shaxslar jarimaga tortiladi”, — deyiladi PFL bayonotida.
Izoh (0)