O‘zbekiston elchixonasi ko‘magida Ozarbayjonda og‘ir ahvolda qolgan o‘zbekistonlik vatanga olib kelindi, deb xabar bermoqda “Dunyo” axborot agentligi.
Diplomatik vakolatxona ma’lumotlariga ko‘ra, M.J. og‘ir dardga chalingani (insult) munosabati bilan tibbiy yordam olish va O‘zbekistonga qaytish uchun amaliy yordam so‘rab murojaat qilgan. Fuqaro bilan o‘tkazilgan muloqotda ma’lum bo‘lishicha, u 10 yil davomida o‘g‘li J.J. bilan Ozarbayjonda noqonuniy yashab kelgan.
Bemorga tezkorlik bilan tibbiy yordam ko‘rsatish maqsadida shifoxonaga yotqizish choralari ko‘rilgan. Biroq tibbiy sug‘urta va zarur hujjatlar yo‘qligi sababli turli muammolar kelib chiqqan. Yakunda bemor va uning o‘g‘li bilan kelishgan holda ularni O‘zbekistonga qaytarish to‘g‘risida qaror qabul qilingan.
Ozarbayjondagi faol vatandoshlar ko‘magida M.J. va uning o‘g‘liga Boku—Toshkent yo‘nalishidagi samolyotga chipta sotib olingan va ular 29-mart kuni O‘zbekistonga kuzatib qo‘yilgan.
Shu kabi holat Tailandda ham kuzatilgandi. 30-mart kuni insultga chalingan o‘zbekistonlik vatanga qaytarilgandi. Fuqaro Tailandga ishlash maqsadida kelgan, ammo tibbiy sug‘urta olmagan, shuningdek, ish beruvchi bilan mehnat shartnomasini ham tuzmagan. Bunday holatlar ko‘payib borayotgani sabab O‘zbekistonning Bangkokdagi Bosh konsulxonasi O‘zbekiston fuqarolariga chet elga sayohat qilish yoki ishlash uchun ketayotganda tibbiy sug‘urta olish, shuningdek, ish beruvchi bilan mehnat shartnomasini tuzish zarurligini bildirdi.
Izoh (0)