Rossiya O‘zbekistonga odam savdosi bilan shug‘ullanuvchi O‘zbekiston fuqarosi Umidjon Fatullayevni topshirdi, deya xabar berdi RF prokuraturasi matbuot xizmati.
“Anhor.uz” nashrining ma’lum qilishicha, O‘zbekiston huquqni muhofaza qilish organlari tomonidan Fatullayevga O‘zbekiston Respublikasi Jinoyat kodeksining 135-moddasi “g” bandi bo‘yicha (uyushgan guruh tomonidan yoki uning manfaatlarini ko‘zlab sodir etilgan odam savdosi, ya’ni odamni olish-sotish yoxud odamni undan foydalanish maqsadida yollash, tashish, topshirish, yashirish yoki qabul qilish) qidiruv e’lon qilingan.
Ma’lum bo‘lishicha, 2012-yilda u o‘ziga hamyurt bo‘lgan ikki yosh qizni ofitsiantlik bilan shug‘ullanib katta pul topish va’dasi bilan Tailand Qirolligining Pattayya shahriga keltirgan va ularga jismoniy zo‘ravonlik o‘tkazib, fohishalik bilan shug‘ullanishga majbur qilgan.
2013-yil noyabrida davlatlararo qidiruvda bo‘lgan Fatullayev Rossiya IIV shahar boshqarmasi xodimlari tomonidan qo‘lga olingan va 2014-yil bahorida O‘zbekistonga topshirilgan. U 8 yildan 12 yilgacha qamoq jazosiga mahkum etilishi mumkin.
Izoh (0)