Toshkent viloyatida IIBB tomonidan o‘tkazilgan tezkor tadbirda qizlarni aldov yo‘li bilan Rossiyaga jo‘natayotgan 22 yoshli ayol Toshkent xalqaro aeroportida qo‘lga olindi.
Qayd etilishicha, Toshkent viloyati IIBB va uning quyi tizim tezkor xodimlari tomonidan navbatdagi odam savdosi bilan bog‘liq holatga chek qo‘yildi. Nazorat tadbiri davomida Yangiyo‘l tumanida yashovchi, 2002-yilda tug‘ilgan, Bonu taxallusi bilan tanilgan ayol Toshkent va Xorazm viloyatida yashovchi ikki nafar tengdoshi (ayollar)ni mo‘may daromad topadigan ish topib berishni va’da qilib, fohishalik bilan shug‘ullanish maqsadida (Toshkent xalqaro aeroportidan Toshkent—Jukovskiy aviareysi orqali) Rossiyaga jo‘natayotgan vaqtida ushlandi.
Mazkur holatlar yuzasidan ushlangan shaxsga nisbatan Jinoyat kodeksi 135-moddasi bilan jinoyat ishi qo‘zg‘atilgan. Tergov harakatlari olib borilmoqda.
Ma’lumot berilishicha, 2023-yil davomida viloyat IIBB va uning quyi tizim xodimlari tomonidan odam savdosiga qarshi kurash yo‘nalishida amalga oshirilgan tezkor-qidiruv tadbirlari natijasida Toshkent viloyatida 15 nafar fuqaro odam savdosi qurboni bo‘lishining oldi olindi.
Aniqlangan holatlar yuzasidan 19 nafar ayol va 3 nafar erkak, jami 22 nafar shaxsga nisbatan jazo muqarrarligi ta’minlanib, jinoiy javobgarlikka tortilgan.
Izoh (0)