Kambodja Tailand bilan chegara mojarolari bo‘yicha Xalqaro sudga shikoyat qiladi. Yaqinda ikki mamlakat o‘rtasida chegarada to‘qnashuv bo‘lib, unda Kambodja askari halok bo‘lgan edi. Bu haqda Arab News xabar berdi.
“Umid qilamizki, Tailand ushbu masalani Xalqaro sudga topshirishga rozi bo‘ladi va yana qurolli qarama-qarshilikka yo‘l qo‘yilmaydi”, dedi Kombodja bosh vaziri Xun Manet.
Kambodja agar Tailand bunga rozi bo‘lmasa ham shikoyat qilishini bildirdi. Janubi-sharqiy osiyolik qo‘shnilar o‘rtasidagi harbiy to‘qnashuvlar 2008-yilda boshlangan va bir necha yil davomida vaqti-vaqti bilan to‘qnashuvlar bo‘lib turgan. Oqibatda kamida 28 kishi halok bo‘lgan. Ularning eng so‘nggisi 28-may kuni sodir bo‘lgandi. Hodisada Kambodja, Tailand va Laos o‘rtasidagi qo‘shma chegara hududi — Zumrad uchburchak deb nomlanuvchi joyda kambodjalik askar halok bo‘lgan edi.
Ertasi kuni Kambodja tashqi ishlar vazirligi Tailandning Pnompen shahridagi elchixonasiga xat yo‘llab, asossiz hujum bo‘yicha zudlik bilan tergov o‘tkazishni talab qilgan. Mamlakat harbiylari uchrashib, keskinlikni yumshatishga kelishib olgan. Tailandga ko‘ra, yaqin ikki hafta ichida Qo‘shma chegara qo‘mitasi yig‘ilib, muammo hal qilinadi.
Izoh (0)