Tailand O‘zbekiston fuqarolari uchun vizasiz rejim joriy qilgani haqida xabarlar tarqalgandi. Tashqi ishlar vazirligi matbuot kotibi Axror Burxonov bu maʼlumot bo‘yicha izoh berdi.
Tailand ommaviy axborot vositalarida mamlakat iqtisodiyotini rag‘batlantirish maqsadida hukumat viza qoidalarini yumshatishni o‘z ichiga olgan iqtisodiy rag‘batlantirish rejasini eʼlon qilgani to‘g‘risida axborot 29-may kuni tarqatilgandi. Unga ko‘ra, Tailandga 60 kungacha vizasiz kirish huquqiga ega davlatlar soni amaldagi 57 tadan 93 taga ko‘payadi, 36 ta yangi davlatlar qatoriga O‘zbekiston ham kiritilgan.
“Ushbu masala bo‘yicha mamlakatimizning Bangkokdagi bosh konsulxonasi Tailand Tashqi ishlar vazirligi bilan bog‘landi. Tailand TIV Konsullik departamenti maʼlumotiga ko‘ra, viza rejimining uzaytirilishi to‘g‘risida hozircha rasman hech qanday maʼlumot eʼlon qilingani yo‘q”, — deydi Axror Burxonov.
Tailand TIV mintaqaviy boshqarmasi maʼlumotiga ko‘ra, viza tartibini soddalashtirish bo‘yicha hukumat qarori mavjud va bu bo‘yicha Konsullik departamenti tomonidan Tailandning xorijdagi diplomatik vakolatxonalariga tegishli yo‘riqnoma yuboriladi va TIV saytida rasmiy maʼlumot chop etiladi.
“Shuningdek, bir tomonlama joriy etilayotgan viza rejimini soddalashtirish tartibi maʼlum muddatdan so‘ng bekor qilinishi mumkin. O‘zbekiston TIV Tailand tomonidan rasmiy nota olinishi bilan qo‘shimcha xabar beramiz”, — dedi tashqi ishlar vaziri matbuot kotibi.
Eslatib o‘tamiz, 2022-yilda o‘zbekistonliklar uchun Tailandda vaqtincha bo‘lish muddati 15 kundan 30 kungacha uzaytirilgandi.
Izoh (0)