Koreya Futbol Assotsiatsiyasi (KFA) maslahat qo‘mitasi 15-yanvar kungi yig‘ilishida Osiyo Kubogi yarim finalida uchralgan mag‘lubiyatdan so‘ng Yurgen Klinsmanning faoliyatini keskin tanqid qildi va rahbariyat uni iste’foga chiqarish kerakligini aytib o‘tdi.
Terma jamoalar qo‘mitasi ma’muriy qarorlar qabul qila olmaydi va shartnomasi JCH—2026 gacha bo‘lgan Klinsmanni iste’foga chiqarish bo‘yicha qaror qabul qilish majburiyatini assotsatsiyaning Ijroiya kengashiga qoldiradi.
FIFA reytingida 23-o‘rinni egallab turgan Janubiy Koreya shu oy boshida Osiyo Kubogidan o‘rin olgan yarim final o‘yinida 87-o‘rinda borayotgan Iordaniyaga 2:0 hisobida mag‘lub bo‘lgan va muxlislar, ba’zi siyosatchilar tomonidan 59 yoshli mutaxassis keskin tanqid qilinib, uning iste’fosini so‘ragan.
Germaniyalik mutaxassisning Koreyadagi mashhurligi turnir davomida keskin tushib ketdi, ko‘pchilik uning yurish-turishini tanqid qildi, hatto, maydonda jamoasi yutqazayotganda ham tabassum qilishi ko‘pchilikka yoqmadi.
Klinsmann ko‘p vaqtini Janubiy Koreyada o‘tkazishga va’da berganiga qaramay, o‘zi yashaydigan Los-Anjelesda turib ishlagani uchun bir necha bor tanqidlarga uchragandi. U payshanba kungi uchrashuvda ham videoqo‘ng‘iroq orqali ishtirok etdi.
“Turli sabablarga ko‘ra, murabbiy Klinsmann endi terma jamoa murabbiyi sifatida ishlay olmaydi va tashkilot uni ishdan bo‘shatishi kerakligi xulosa qilindi”, — dedi assotsiatsiyaning texnik direktori Hvan Bo-Kvan yig‘ilishdan so‘ng jurnalistlarga.
“Klinsmanning o‘z ishiga bo‘lgan munosabati, shu jumladan, Janubiy Koreyada istiqomat qilmay faoliyat olib borgani jamoatchilikka nisbatan hurmatsizlik ekanligi aytilmoqda”, — qo‘shimcha qildi Hvan.
Ma’lumotlarga ko‘ra, Klinsmann chetlatilsa, Tailandga qarshi bo‘lib o‘tadigan Jahon Chempionati saralash o‘yini uchun jamoani vaqtincha boshqarishi mumkin bo‘lgan nomlar orasida janubiy koreyalik sobiq futbolchi Xong Myung Bo ham bor.
Izoh (0)