Tailandda sobiq bosh vazir Thaksin Shinavatra qirolni haqorat qilgani uchun sudlandi. Bu haqda Tailand Bosh prokuraturasi xabariga asoslanib, China Daily nashri xabar berdi.
Manbada aytilishicha, sobiq bosh vazir 2015-yilda, surgunda yurgan paytda Janubiy Koreya OAVlariga bergan intervyusi ayblov uchun asos bo‘lgan. Siyosatchi hukumatni va rahbariyatni asossiz ravishda tanqid qilganlikda ayblangan.
Tailand bosh prokurori matbuot kotibi Prayut Pecharakunning aytishicha, 74 yoshli Thaksin Tailandning dunyodagi eng qattiq qonunlardan biri bo‘lgan lese-majeste qonuni bo‘yicha ayblovlarga javob berish uchun 18-iyun kuni sudga chaqirildi. Sobiq bosh vazir, shuningdek, raqamli jinoyat to‘g‘risidagi qonunni buzganlikda ayblanmoqda.
Taniqli telekommunikatsiya magnati Thaksin Shinavatra ilk bor 2001-yilda bosh vazir etib saylangan. Biroq besh yil o‘tib, shahar o‘rta sinfining ommaviy noroziliklari va harbiy to‘ntarish natijasida lavozimidan chetlatilgan.
“Bosh prokuror Thaksinni monarxiyani haqorat qilganlikda ayblashga qaror qildi”, — degan bosh prokuratura matbuot kotibi jurnalistlarga.
Thaksin o‘tgan yilning avgust oyida qizi boshchiligidagi “Feu Tay” partiyasi saylovda g‘alaba qozonishi ortidan Tailandga qaytgan edi. Partiya rahbariyati sobiq bosh vazirning mamlakat uchun sarosima keltirmasligini kafolatlashini maʼlum qilgan.
Thaksin Shinavatra telekommunikatsiya sohasida boyib ketgan milliarder hisoblanadi. Tailandda uning ko‘plab tijoratlari va ko‘chmas mulklari hali ham u rahbarlik qiluvchi oila tomonidan boshqarilishi aytiladi.
Izoh (0)