Suriya Isroil bilan munosabatlarni normallashtirish bo‘yicha olib borilayotgan muzokaralar davomida endi Isroil tomonidan anneksiya qilingan Jo‘lon tepaliklarini qaytarib berishni talab qilmayapti. Bu haqda The Times of Israel nashr xabar bermoqda.
“Suriya hozirgi tinchlik kelishuvi bo‘yicha muzokaralar jarayonida Isroildan 1967-yilda bosib olingan Jo‘lon tepaliklarining bir qismini qaytarishni talab etmayapti”, deya yozadi nashr.
Ta’kidlanishicha, Suriyaning muzokaralardagi asosiy talablari Isroilning Ahmad ash-Sharaa boshchiligidagi yangi hokimiyatni tan olishi va Isroil qo‘shinlarini yanvar oyida mamlakat janubida egallagan hududlardan olib chiqishidir. Bundan tashqari, Damashq mamlakatning janubiy chegarasidagi xavfsizlik choralarini aniq belgilashni, shuningdek, Qo‘shma Shtatlar tomonidan Suriyaga yordam ko‘rsatilishini talab qilmoqda.
Jo‘lon tepaliklari 1967-yildagi Olti kunlik urushdan so‘ng Isroil tomonidan bosib olingan edi. Damashq 50 yildan ortiq vaqt davomida o‘ziga tegishli deb tan olingan ushbu hududlarni qaytarib berishni talab qilib kelayotgandi.
Bundan avval Suriyaning yangi ma’muriyati Isroilning janubi-g‘arbiy Al-Kunaytra viloyatidagi tinch hududlarga doimiy hujumlarini to‘xtatish ustida ishlayotgani xabar qilingandi.
22-iyun kuni Isroil Milliy xavfsizlik kengashi rahbari Saxi Xanegbi Suriya bilan muzokaralarda shaxsan ishtirok etayotganini bildirdi.
Birlashgan Arab Amirliklari Isroil va Suriya o‘rtasidagi muzokaralar uchun maxfiy aloqa kanalini tashkil etgani xabar qilingandi.
Suriya va Isroil munosabatlari fevral oyi oxirida, Damashq yaqinidagi Jaramana aholi punktida o‘tish davri hukumati xavfsizlik xodimlari va o‘zini o‘zi mudofaa kuchlari o‘rtasida to‘qnashuv sodir bo‘lganida keskinlashdi. Isroil shu munosabat bilan Suriyaning yangi hukumati etnik-konfessional ozchiliklarga bosim o‘tkazayotganini ma’lum qildi va qurolli kuchlariga Suriyadagi druzlar jamoasini himoya qilishni ta’minlashni topshirdi.
30-aprel kuni Isroil armiyasi Suriyadagi ekstremistik guruh yacheykasiga zarba berdi. Isroil tomoni radikallar druz aholisiga hujum qilishni rejalashtirganini ta’kidladi
Izoh (0)