Suriyaning yangi ma’muriyati Isroilning janubi-g‘arbiy Al-Kunaytra viloyatidagi tinch hududlarga doimiy hujumlarini to‘xtatish ustida ishlamoqda. Bu haqda respublika prezidenti Ahmad ash-Shara ma’lum qildi.
Uning so‘zlari prezident devonining X’da joylashtirilgan bayonotida keltirilgan.
“Biz xalqaro vositachilar orqali bilvosita muzokaralar yo‘li bilan Isroil hujumlarini to‘xtatishga intilmoqdamiz”, dedi ash-Shara.
Bayonotda aytilishicha, ma’muriyat rahbari Al-Kunaytra viloyati va bosib olingan Golan tepaliklarida yashovchi tog‘lik druzlar jamoasi oqsoqollari bilan uchrashgan. Suhbat davomida “so‘nggi oylarda Isroilning Suriya hududiga bostirib kirishi kuchayishi munosabati bilan mintaqadagi mahalliy aholining turmush sharoiti va xavfsizlik holati” muhokama qilingan.
Syria TV telekanalining ta’kidlashicha, ash-Sharaning ushbu bayonoti Damashqning Isroil bilan bilvosita muzokaralar olib borayotgani haqidagi birinchi tasdig‘i bo‘lgan.
22-iyun kuni Isroil Milliy xavfsizlik kengashi rahbari Saxi Xanegbi Suriya bilan muzokaralarda shaxsan ishtirok etayotganini bildirdi.
Birlashgan Arab Amirliklari Isroil va Suriya o‘rtasidagi muzokaralar uchun maxfiy aloqa kanalini tashkil etgani xabar qilingandi.
Suriya va Isroil munosabatlari fevral oyi oxirida, Damashq yaqinidagi Jaramana aholi punktida o‘tish davri hukumati xavfsizlik xodimlari va o‘zini o‘zi mudofaa kuchlari o‘rtasida to‘qnashuv sodir bo‘lganida keskinlashdi. Isroil shu munosabat bilan Suriyaning yangi hukumati etnik-konfessional ozchiliklarga bosim o‘tkazayotganini ma’lum qildi va qurolli kuchlariga Suriyadagi druzlar jamoasini himoya qilishni ta’minlashni topshirdi.
30-aprel kuni Isroil armiyasi Suriyadagi ekstremistik guruh yacheykasiga zarba berdi. Isroil tomoni radikallar druz aholisiga hujum qilishni rejalashtirganini ta’kidladi
Izoh (0)