Uylar jonlanib, qahramonlar siz bilan suhbatlashayotgan g‘ishtchalardan qurilgan shahar bo‘ylab yurganingizni tasavvur qiling. Bunday ertaksimon ko‘ngilochar bog‘ 5-iyul kuni Shanxayda o‘z eshiklarini ochadi. U 30 gektardan ortiq maydonni egallab, brend tarixidagi eng yirik parkka aylandi. Mahalliy isteʼdodlarning raqamli yechimlari yaʼni interaktiv, 3D, animatronika texnologiyalari alohida eʼtiborga loyiq. Hatto mehmonxona xonalari ham bu yerda kichik konstruktorlarga o‘xshab ketadi.
Shanxayda 2025-yilning yoz oyida dunyodagi eng yirik Legoland ko‘ngilochar bog‘i ochilmoqda. To‘liq ishga tushirish 5-iyulga rejalashtirilgan, ammo tayyorgarlik ishlari allaqachon boshlangan. Yangi majmua shaharning janubi-g‘arbida, Jinshan tumanida joylashgan. Loyiha qariyb 550 million dollarga tushgan. Hisob-kitoblarga ko‘ra, bu yerga yiliga 2,5 milliongacha tashrif buyuruvchi kelishi kutilmoqda.
Hudud maydoni 30 gektardan ortiq. Unda har biri o‘z syujeti, dizayni va faoliyatiga ega sakkizta zona qurilgan. Bu yerda nafaqat anʼanaviy arg‘imchoq va sirpanchiqlar — aksariyat obyektlar inson harakatlariga javob beradi: mexanizmlarni ishga tushirish, konstruksiyalarni yig‘ish, animatsion qahramonlar bilan muloqot qilish mumkin. Jonli elementlar LEGO qismlaridan yig‘ilgan binolar va haykallar bilan o‘ralgan. Ularning umumiy soni 85 milliondan ortiq bo‘lib, bir qismi o‘rnatilgan sensorlar va yorug‘lik diodlari yordamida boshqariladi.
Park ko‘rinishidan o‘yinchoqlardan qurilgan jonli shaharni eslatadi: qasrlar, stansiyalar, suv osti manzaralari, kosmik bazalar. Ammo chiroyli ko‘rinish ortida aql-idrok yotibdi — ayrim hududlarda sensorli panellar va proyeksion displeylar o‘rnatilgan. Bola tugmani bosishi bilan bino “jonlanadi”: derazalarda chiroq yonadi, mo‘rilardan bug‘ chiqadi, kichik figuralar gapira boshlaydi. To‘liq raqamli stendlar ham bor — masalan, o‘z to‘plamingizni loyihalashtirib, keyin uni 3D formatda qandayligii ko‘rishingiz mumkin. Yoki yuzingizni o‘yin avtomatiga yuklab, u sizni LEGO-odamchaga aylantirib qo‘yishi mumkin.
Attraksionlardan tashqari, bu yerda konstruktor uslubidagi 250 xonali mehmonxona, kafelar va suvenir do‘konlari mavjud. Ko‘p narsalar bolalar bilan birgalikda dam olishga mo‘ljallangan: xonalarda alohida o‘yin maydonlari bor, restoranlarda esa to‘g‘ridan-to‘g‘ri stol ustida ijod qilish uchun maxsus to‘plamlar beriladi. Shu bilan birga, kattalar ham bu yerda ko‘rish uchun qiziqarli narsalar topishlari mumkin — texnik yechimlar hayratlanarli: animatronika, yorug‘lik shoulari, muvofiqlashtirilgan ovozlar va harakatlar shular jumlasidandir.
Shanxaydagi Legoland qurilishi 2021-yilda boshlangan. Bu shaharni oilaviy turizm markaziga aylantirish rejasining bir qismidir. Hozirda bu hududda yirik Disney parki va Haichang dengiz majmuasi qurilgan. Yangi obyekt umumiy jozibadorlikni oshirishi kerak. Endi megapolisga bir tashrif bilan uch xil olamga kirish oson bo‘ldi — multfilm qahramonlari bilan muloqot qilish va kubiklar dunyosiga sho‘ng‘ish mumkin.
Dastlabki tashrif buyuruvchilar hamma narsa aql bovar qilmaydigan darajada tashkil etilganini ko‘rib ulgurishdi. Sinov kunlari rejadagidek davom etmoqda: muhandislar tizimlarni tekshirmoqda, xodimlar mashq qilmoqda va kichik nosozliklar bartaraf etilmoqda. Amalga oshirilgan ishlar yorqin, ulkan va ertaksimon ko‘rinadi. Ochilish marosimi shov-shuvli bo‘lishi kutilmoqda — va ko‘lamiga qaraganda, Legoland Osiyodagi eng texnologik parklardan biri sifatida nom qozonadi. Butun oila bilan sayohatga chiqish vaqti kelmadimikin?
Izoh (0)