Lego kompaniyasi “Qirol sher” multfilmining 30 yilligini nishonlash arafasida o‘zining yangi konstruktorlik “Yosh Simba Qirol sher” (Young Simba the Lion King) to‘plamini taqdim etdi, deb xabar berdi Europa Plus nashri.
Konstruktor 1445 ta qismdan, jumladan, harakatlanuvchi bo‘laklardan iborat bo‘lib, ular to‘liq yasalgan Simbaning qo‘l va boshini turli yo‘nalishda harakatga keltirish imkonini beradi.
Mazkur to‘plamni yig‘ishda qiynalmaslik uchun ishlab chiqaruvchi kompaniya Lego Builder ilovasidan foydalanishni tavsiya etadi. Unda konstruktorning 3D modelini ko‘rish, kattalashtirish va aylantirish mumkin. To‘liq yig‘ilganda Simbaning balandligi 29 santimetrni tashkil qiladi. Undan o‘yinchoq yoki xona uchun dekoratsiya sifatida foydalanish mumkin.
Lego Young Simba the Lion King to‘plamini avvaldan buyurtma qilish mumkin. Bunday o‘yinchoq narxi hozirda 130 dollarga baholanmoqda. Sotuvga esa 1-iyundan chiqariladi.
Eslatib o‘tamiz, “Qirol sher” Simba ismli jasur sher bolasining ulg‘ayishi haqidagi multfilmdir. U Walt Disney Pictures tomonidan 1994-yilda yaratilgan.
Avvalroq Disney kompaniyasi “Mufasa: Qirol sher” multfilmi treylerini e’lon qilgani haqida xabar berilgandi.
Izoh (0)