Ba’zan oddiy blogerlarning ixtirosi yirik kompaniyalarning texnologik yangiliklariga qaraganda original va ajoyib bo‘ladi. Masalan, YouTube platformasida Creative Mindstorms nomli kanal muallifi Sten o‘zining ixtirosi bilan internet foydalanuvchilarni hayratga soldi.
![](/static/2024/06/25/0-FLDk8nZm.webp)
U obunachilari bilan PixelArt robotini yig‘ish jarayoni aks etgan videoni bo‘lishdi. Ushbu qurilmaning asosiy jihati shundaki, u Lego bo‘laklaridan istalgan ko‘rinishdagi chiroyli pikselli tasviriy san’at asarini yaratishi mumkin.
![](/static/2024/06/25/1-AYdK7sRs.png)
Sten tomonidan ishlab chiqarilgan qurilmaning deyarli barcha qismlari legodan iborat printerni tashkil etadi. Uning ish maydoni 32x32 piksel o‘lchamda. Gadjet o‘z ichiga olgan kubik shaklidagi bo‘laklardan turli tasvirlarni chop etadi.
![](/static/2024/06/25/2-6f_y52WN.png)
PixelArt biror suratni chiqarishi uchun unga bu haqda ma’lumot va buyruq kiritish, so‘ng rasm generatsiya bo‘lishini kutish kerak. Buyruq tasdiqlangandan so‘ng, qurilma chop etishni boshlaydi.
![](/static/2024/06/25/3-eJS0Ldpw.png)
“Printerni ishlab chiqishga taxminan olti oy vaqt kerak bo‘ldi. Ketkazilgan vaqt va sarflangan mehnat bunga arziydimi, degan savolga men hech shubhalanmay “Ha!” deb javob beraman”, — dedi bloger.
Darhaqiqat, bunday printerni yaratishga katta mehnat ketdi. Sten DALL-E servisi bilan Python dasturida printer uchun maxsus dasturlash tizimini yaratdi. Lego-printer hozirda 15 xil rangdagi kubiklardan bo‘yoq sifatida foydalanadi. Masalan, birinchi chop etilgan rasm “Kungaboqar gulini ushlab turgan g‘ayrioddiy robot” deb nomlanadi:
![](/static/2024/06/25/4-pzKBA0XQ.png)