Burj Xalifa va Empire State Building binosini bir vaqtda qanday ko‘rish mumkinligini bilasizmi? Yo‘q, internetdagi rasm va videolarda emas. Buning uchun 25-maydan 22-sentyabrgacha Sietlda bo‘lib o‘tadigan Towers of Tomorrow — Lego ko‘rgazmasiga tashrif buyurishingiz mumkin. Lego’dan yasalgan arxitektura namunalariga qiziquvchilarni bu yerda ko‘plab qiziqarli dasturlar kutmoqda.
Ushbu ajoyib ko‘rgazma dunyodagi eng mashhur va innovatsion osmono‘par binolarning hamda barcha uchun sevimli Lego qurilish materialining kombinatsiyasidir. Unda Shimoliy Amerika, Osiyo va Avstraliyaning me’moriy obidalari va binolari namoyish etiladi, — deyiladi rasmiy saytda.
Ko‘rgazma tashkilotchisi Janubiy Uels tarix va sanoat muzeyi bo‘lib, unda Rayan Maknot bosh arxitektor sifatida ishtirok edi. U Lego bo‘yicha sertifikatga ega mutaxassis bo‘lib, dunyoda atigi 21 kishida shunday sertifikat mavjud.
Rayan jamoasi bilan birgalikda ko‘rgazma uchun 18 ta mashhur binolar maketini, jumladan, Burj Xalifa, Empire State Building, Petronas egizak minoralarini qurdi. Ularga jami 577 000 dan ortiq detallar ketdi. Lego qismlarining aksariyati zamonaviy Xitoyning ramzi bo‘lgan Shanxay minorasi uchun ishlatildi. Ma’lum bo‘lishicha, uning narxi 100 000 dollardan oshadi.
Lego’ning Towers of Tomorrow ko‘rgazmasiga tashrif buyuruvchilar nafaqat maketlarni tomosha qilishi, balki o‘zlari ham biror narsa qurishi mumkin. Buning uchun tashkilotchilar 200 000 qismdan iborat maxsus maydonlar tayyorlab qo‘ydi.
Lego bilan ishlashda bolalar ham, kattalar ham dizayn va arxitekturadan ko‘p narsani o‘rganishi mumkin. Mantiqiy yondashuv va ijodkorlikni talab etadigan mazkur o‘yin barchaga birdek manzur bo‘ladi, — dedi Tarix va sanoat muzeyida ko‘rgazmalar va tarjima xizmatlari boshlig‘i Devora Romanek.
Izoh (0)