Respublika bo‘yicha 200 dan ortiq dorixonalar 2,6 milliard so‘mdan ortiq asossiz daromad olgani aniqlanib, ularni qaytarish bo‘yicha tegishli choralar ko‘rildi, deb xabar bermoqda Raqobat qo‘mitasi matbuot xizmati.
Qo‘mita tomonidan Fair tech yagona axborot tizimi orqali dorixonalarda dori vositalarini sotishda belgilangan savdo ustamalariga rioya etilmagani holatlari o‘rganib borilgan. Yagona axborot tizimi orqali kelib tushgan xabarlar bo‘yicha 2025-yilning o‘tgan davri davomida olib borilgan o‘rganishlarda 225 ta dorixonada 62 704 ta holatda dori vositalarning savdosi bo‘yicha 2,6 milliard so‘m asossiz daromad olingani aniqlandi hamda belgilangan tartibda ish qo‘zg‘atilib, mablag‘larni qaytarish bo‘yicha tegishli choralar ko‘rildi.
Jumladan, ulgurji savdoda:
- 1744 ta holatda — “Evro Farm Biznes” MCHJ XK;
- 1695 ta holatda — Tar Pharm Alliance MCHJ;
- 5191 ta holatda — “Garmoniya Farm” MCHJ.
Narxlarni asossiz oshirish alomatlari bo‘yicha yuqoridagi MCHJlarga nisbatan qo‘mitaning maxsus komissiyasi tomonidan ish qo‘zg‘atildi.
Raqobat qo‘mitasi dorixonalarda resept bilan beriladigan dori vositalari belgilangan narxlariga rioya etilmay sotilgan taqdirda chora ko‘rilishi haqida ogohlantirdi.
2025-yilning boshlarida farmatsevtika faoliyati bilan shug‘ullanuvchi tadbirkorlik subyektlari tomonidan referent narxlarning oshirilishi yuzasidan o‘tkazilgan monitoringda 1300 ga yaqin dorixonalarda qonunbuzilish holatlari aniqlangandi. 2024-yilning 7 oyida dori vositalarini narxlarini asossiz oshirish natijasida iste’molchilardan 5,4 milliard so‘mga yaqin mablag‘, ya’ni asossiz daromad olingani aniqlangan. Noqonuniy olingan mablag‘lar iste’molchilar foydasiga qayta hisob-kitob qilinib, ularning huquqlarini tiklash choralari ko‘rilgan.
Dorixonalarda sotilgan dori vositalari va tibbiy buyumlar uchun belgilangan ustamalardan yuqori mablag‘ olingani aniqlansa, ortiqcha pulni isteʼmolchiga qaytarish tizimi 2023-yil 1-maydan ishga tushirilgandi. Ushbu tartibga ko‘ra, isteʼmolchilar tomonidan dorixonalarda xarid qilingan dori vositalari va tibbiy buyum xarid cheklarining QR-kodi “Soliq” mobil ilovasida ro‘yxatdan o‘tkazilganda belgilangan ustamalardan yuqori mablag‘ olingani aniqlansa, avtomatik ravishda Raqobat qo‘mitasiga xabar yuborilib, ortiqcha olingan mablag‘ni isteʼmolchiga qaytarish tizimi ishga tushirilmoqda.
Izoh (0)