O‘zbekistonda birinchi marta soliq organlari fiskal cheklar bo‘yicha dori vositalari savdosi haqidagi maʼlumotlarni taqdim etdi.
Qayd etilishicha, respublika bo‘yicha 8 002 ta dorixona ro‘yxatga olingan bo‘lib, ularda 15 609 ta onlayn-NKT mavjud. Xarid qilingan dori vositalari uchun isteʼmolchilarga berilgan fiskal cheklarda ko‘rsatilgan MXIK asosida aholining tibbiy preparatlar uchun qancha mablag‘ sarflayotgani to‘g‘risida maʼlumotlar shakllanadi.
2024-yilning oyida dori vositalari uchun eng katta xarajatlar Toshkent shahri (2,1 trillion so‘m), Samarqand (986,9 milliard so‘m) va Toshkent viloyatlarida (663,4 milliard so‘m) qayd etilgan.
Poytaxt ko‘rsatkichlari yirik tibbiyot muassasalarining aynan ushbu hududda joylashgani hisobiga shakllangan. Respublika hududlari kesimida eng kam xarajatlar Jizzax (201,3 milliard so‘m), Navoiy (191,6 milliard so‘m) va Sirdaryo (170 milliard so‘m) viloyatlariga to‘g‘ri kelgan.
Yuqoridagi raqamlar va har bir hududda ro‘yxatga olingan aholi sonidan kelib chiqqan holda yil boshidan o‘rtacha bir kishi dori vositalariga:
- Toshkent shahrida – 750 ming so‘m;
- Buxoro viloyatida – 277 ming so‘m;
- Samarqand viloyatida – 245,1 ming so‘m sarflagan.
- Yanvar may oylarida aholi jon boshiga nisbatan kamroq xarajatlar quyidagi hududlarda qayd etilgan:
- Qashqadaryo viloyatida – 120 ming so‘m;
- Qoraqalpog‘iston Respublikasida – 118 ming so‘m;
- Surxondaryo viloyatida – 114 ming so‘m.
Bunday maʼlumotlar soliq organlarining maʼlumotlar bazasida nafaqat viloyatlar, balki har bir tuman va mahalla kesimida shakllanadi. Fiskal cheklar maʼlumotlari tahliliga ko‘ra, eng ko‘p mablag‘ quyidagi kasalliklarni davolash uchun mo‘ljallangan dori vositalariga sarflangan:
- yurak-qon tomir kasalliklari;
- infeksion kasalliklar;
- og‘riq qoldiruvchi vosita;
- asab tizimi kasalliklari;
- oshqozon-ichak kasalliklari;
- nafas olish yo‘llari kasalliklari;
- tayanch-harakat tizimi;
- tomoq-burun kasalliklari;
- jigar kasalliklari.
Dori vositalari majburiy raqamli markirovkalanishi lozim. Dori vositalari markirovkasining haqiqiyligini Soliq mobil ilovasi orqali tekshirish mumkin, — deyiladi xabarda.
Avvalroq O‘zbekistonda farmatsevtika tarmog‘ida narxni kamida 20 foizga arzonlashtirish mumkinligi aytilgan edi. Prezident soha uchun malakali mutaxassislar tayyorlash bo‘yicha ko‘rsatmalar berilgandi.
Izoh (0)