Qoraqalpog‘iston Respublikasi va Xorazm viloyatida kuchli taʼsir qiluvchi dori vositalarini muomalaga kiritilishing oldi olindi, deb xabar beradi Bosh prokuratura huzuridagi departament.
Qayd etilishicha, departamentning Qo‘ng‘irot tuman bo‘limi va IIB xodimlari bilan hamkorlikda tezkor tadbir o‘tkazilgan. Tadbirda “Q.S.” MCHJga qarashli do‘kon sotuvchisi J.R. fuqaro G.B.ga jami 15 quti “Reduksin layt” va “Goryachiy perets” nomli kuchli taʼsir qiluvchi dori vositasini 1,1 million so‘mga sotgan vaqtida ushlanib, fuqaro J.R.dan umumiy qiymati 15,3 million so‘mlik jami 818 dona kuchli taʼsir qiluvchi dori vositalari ashyoviy dalil sifatida olingan.
Shu kabi, departamentning Xonqa tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda “J.O‘.” xususiy korxonasi dorixona sotuvchisi N.O. hech qanday hujjatsiz jami 50 dona “TEBANTIN” nomli kuchli taʼsir qiluvchi dori vositasini Q.A.ga sotgan vaqtida ushlanib, ushbu dorixonadan yana 100 dona kuchli taʼsir qiluvchi dori vositalari ashyoviy dalil sifatida olingan.
Mazkur holatlar yuzasidan Jinoyat kodeksining 251-1-moddasi (kuchli taʼsir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Toshkentning Yakkasaroy, Chilonzor hamda Yashnobod tumanlarida kuchli taʼsir qiluvchi dori vositalarini muomalaga kiritilishining oldi olingani to‘g‘risida xabar berilgandi. Shuningdek, Toshkent viloyatida 36 ming dollarlik hujjatsiz dorilarni sotmoqchi bo‘lgan shaxs ushlangan edi.
Izoh (0)