O‘zbekistondagi mingdan ortiq dorixonalarda dori vositalari narxi asossiz oshirib sotilgani aniqlandi

Raqobatni rivojlantirish va iste’molchilar huquqlarini himoya qilish qo‘mitasi dori vositalarini narxlarini asossiz oshirish holatlarni aniqlanganini ma’lum qildi.

Fair Tech yagona axborot tizimi orqali respublika hududlari kesimida farmasevtika faoliyati bilan shug‘ullanuvchi tadbirkorlik subyektlari tomonidan referent narxlarning oshirilishi yuzasidan o‘tkazilgan monitoringda 1300 ga yaqin dorixonalarda qonunbuzilish holatlari aniqlangan.

Jumladan,

• Qoraqalpog‘iston Respublikasida 88 ta dorixona (38 ta ulgurji va 50 ta chakana);
• Andijon viloyatida 49 ta dorixona (44 ta ulgurji va 5 ta chakana);
• Buxoro viloyatida 50 ta dorixona (7 ta ulgurji va 43 ta chakana);
• Jizzax viloyatida 106 ta dorixona (25 ta ulgurji va 81 ta chakana);
• Qashqadaryo viloyatida 43 ta dorixona (9 ta ulgurji va 34 ta chakana);
• Navoiy viloyatida 118 ta dorixona (30 ta ulgurji va 88 ta chakana);
• Namangan viloyatida 119 ta dorixona (65 ta ulgurji va 54 ta chakana);
• Samarqand viloyatida 182 ta dorixona (72 ta ulgurji va 110 ta chakana);
• Surxandaryo viloyatida 18 ta dorixona (17 ta ulgurji va 1 ta chakana);
• Sirdaryo viloyatida 65 ta dorixona (15 ta ulgurji va 50 ta chakana);
• Toshkent viloyatida 134 ta dorixona (20 ta ulgurji va 114 ta chakana);
• Farg‘ona viloyatida 36 ta dorixona (13 ta ulgurji va 23 ta chakana);
• Xorazm viloyatida 36 ta dorixona (18 ta ulgurji va 18 ta chakana);
• Toshkent shahrida 228 ta dorixona (80 ta ulgurji va 141 ta chakana).

Yuqoridagi ro‘yxatdan ko‘rish mumkinki, bunday qonunbuzilish holatlari eng ko‘p Toshkent shahridagi (228 ta) dorixonalarda qayd etilgan. Samarqand, Toshkent, Navoiy, Jizzax viloyatlarida 100 dan ortiq dorixonalarda dori vositalari narxlari asossiz oshirish holatlari aniqlangan.

Olib borilgan o‘rganishlar natijasida 270 mingta holatda jami 11,6 milliard so‘m miqdorida asossiz daromad olingani aniqlanib, ortiqcha olingan pul mablag‘larini iste’molchilarga qaytarish choralari ko‘rilgan.

Raqobat qo‘mitasi dorixonalarni narxlarni asossiz oshirmaslikka va iste’molchilardan ortiqcha mablag‘larni olmaslikka chaqirdi.

Dorixonalarda sotilgan dori vositalari va tibbiy buyumlar uchun belgilangan ustamalardan yuqori mablag‘ olingani aniqlansa, ortiqcha pulni isteʼmolchiga qaytarish tizimi 2023-yil 1-maydan ishga tushirilgandi. Ushbu tartibga ko‘ra, isteʼmolchilar tomonidan dorixonalarda xarid qilingan dori vositalari va tibbiy buyum xarid cheklarining QR-kodi “Soliq” mobil ilovasida ro‘yxatdan o‘tkazilganda belgilangan ustamalardan yuqori mablag‘ olingani aniqlansa, avtomatik ravishda Raqobat qo‘mitasiga xabar yuborilib, ortiqcha olingan mablag‘ni isteʼmolchiga qaytarish tizimi ishga tushirilmoqda.