Toshkent viloyatining Ohangaron tumani hamda Surxondaryo viloyatining Termiz shahrida kuchli taʼsir qiluvchi dori vositalarini muomalaga kiritilishining oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Ohangarondagi “Chinor” YPX maskanida Farg‘ona—Toshkent yo‘nalishida harakatlanib kelayotgan Epica avtomashinasi to‘xtatilib ko‘zdan kechirilganida, yo‘lovchi M.O. 37 dona “Regapen” va 2 dona “Tropikamid” nomli kuchli taʼsir qiluvchi dori vositalarini Toshkent shahrida o‘tkazish maqsadida olib kelayotganligi aniqlangan.
Ushbu dori vositalari ashyoviy dalil sifatida olingan.
Shuningdek, Termiz shahridagi “G.S.” xususiy korxonasiga qarashli dorixona sotuvchisi A.T. tarkibida kuchli taʼsir qiluvchi moddasi bo‘lgan 3 ta kapsula “Omnadren” nolmi dori vositasini 120 ming so‘mga sotgan vaqtida ushlandi.
Ushbu dorixonadan tegishli hujjatlari bo‘lmagan 850 dona “Karbamazepin” va 22 dona “Omnadren ” nomli dori vositalari ashyoviy dalil sifatida olingan.
Mazkur holatlar yuzasidan Jinoyat kodeksining 251-1-moddasi (kuchli taʼsir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq, Farg‘ona viloyatining Buvayda tumani, Xorazm viloyatining Urganch shahri, Surxondaryo viloyatining Oltinsoy hamda Toshkent shahrining Shayxontohur tumanlarida kuchli taʼsir qiluvchi dori vositalari savdosi fosh etilgan edi.
Izoh (0)