Checheniston hukumati respublika qahramonlari sharafiga ism qo‘yilgan 180 ta chaqaloqning oilalariga yarim million rubldan (qariyb 5 ming dollar) to‘lashini ma’lum qildi.
Checheniston rahbari Ramzan Qodirov Tarix yili munosabati bilan o‘tkazilgan tadbir natijalarini yakunlab, 31-dekabr kuni “milliy qahramonlar” sharafiga nomlangan o‘g‘il bolalar tug‘ilgan oilalarga 500 ming rubldan to‘lash haqida ko‘rsatma berdi. Qiz farzandli oilalarga to‘lov nazarda tutilmagan.
Eng mashhur uchlikka lashkarboshi Boysungur Benoyevskiy (97 ta chaqaloq), Kavkazning birinchi imomi Shayx Mansur (53 ta chaqaloq) va Chechenistonning birinchi prezidenti Ahmat-Hoji Qodirov (23 ta chaqaloq) ismlari kiritilgan.
Shuningdek, Muhammad-Bashir, Zelimxon, Bersa, Bersa-Shayx, Ilyos, Muhammad, Magomed, Mansur, Muso, Muslim, Shoip, Erisxon ismlari ham qayd etilgan.
To‘lovlar uchun mablag‘ Rossiya qahramoni Ahmad-Hoji Qodirov nomidagi Mintaqaviy jamoat fondidan ajratilgan.
Avvalroq Checheniston rahbari Ramzan Qodirov modellarni musulmon ayollarga nomunosib tarzda reklama qilayotgan go‘zallik salonlarini yopishga chaqirgan edi.
Salonlar namoyish qilish mumkin bo‘lmagan tana qismlarini ko‘rsatuvchi suratlarni tarqatmoqda. Odamlarni buzadigan salonlarni, albatta, yopish kerak, dedi Qodirov.
Checheniston rahbari xizmati tufayli tashrif buyuruvchilar kasalxonaga tushib qoladigan salonlar faoliyatini ham to‘xtatishga chaqirdi. Bundan tashqari, Qodirov yaqin kelajakda Grozniy shahrida erkaklar va ayollar uchun alohida xizmat ko‘rsatadigan 15 ta dorixona ochilishini aytdi. Respublika poytaxtida shunday dorixonalardan biri ochilgan.
Izoh (0)