Surxondaryo viloyatining Denov tumanida sifatini tasdiqlovchi hujjatlari bo‘lmagan dori vositalarini sotuvga qo‘ygan dorixona fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, “E.O.” MCHJga rahbari Sh.A. dorixonada turli nomdagi sifatini tasdiqlovchi hujjatlari bo‘lmagan, umumiy bahosi 575,4 mln so‘mlik dorilarni savdoga qo‘ygani aniqlandi.
Maʼlumotlarg ko‘ra, dorixonadan jami 198,2 ming dona, shundan 1 396 dona psixotrop, 900 dona kuchli taʼsir qiluvchi hamda 3 146 dona yaroqlilik muddati o‘tgan dorilar ashyoviy dalil sifatida olingan.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
Dori vositalarining noqonuniy savdosi
O‘zbekistonda 2024-yilning 10 oyida 2,5 mingdan ziyod qalbakilashtirilgan dorilar aniqlangan edi. Taqdim qilingan dori vositalari va tibbiy buyumlar o‘rnatilgan tartibda laboratoriya tekshiruvidan o‘tkazilganda, tahlil natijalariga ko‘ra, noqonuniy muomalada bo‘lgan:
- 5 958 o‘ram — davlat ro‘yxatidan o‘tgan va muvofiqlik sertifikati mavjud;
- 17 925 o‘ram — davlat ro‘yxatidan o‘tmagan va muvofiqlik sertifikati mavjud bo‘lmagan;
- 557 o‘ram — yorliqlash ko‘rsatkichi bo‘yicha nomuvofiq (kontrafakt);
- 1 549 o‘ram — yaroqlilik muddati tugagan (sifatsiz);
- 2 524 o‘ram — qalbakilashtirilgan umumiy 52 396 o‘ram farmatsevtika mahsulotlarining tibbiyot amaliyotida qo‘llash mumkin emasligi yuzasidan xulosa berildi.
Ushbu sifatsiz, qalbakilashtirilgan va O‘zbekistonga noqonuniy kirib kelgan farmatsevtika mahsulotlari aylanmasining oldi olindi.
Avgust oyida Andijonda noqonuniy dori vositalari savdosi bilan shug‘ullanganlarga hukm o‘qilgandi. Dori vositalarining umumiy qiymati 1 mlrd 616 mln 802 ming so‘mni tashkil qilgan. Jinoyat ishlari bo‘yicha Qo‘rg‘ontepa tuman sudi tomonidan fuqaroga nisbatan 5 yil hamda sherigiga nisbatan 3 yil muddatga ozodlikdan mahrum qilish jazosi tayinlangan.
Sentyabr oyida Toshkent viloyatining Ohangaron tumanida noqonuniy dori vositalari savdosi bilan shug‘ullanib kelgan shaxslar ushlangan. Oktyabr oyida Toshkent shahrida 2,2 mlrd so‘mlik yaroqlilik muddati o‘tgan dori vositalarini muomalaga kiritilishining oldi olingandi.
Shuningdek, Xorazmda qariyb 240 mln so‘mlik dorilar noqonuniy sotilishining oldi olindi. Bundan tashqari, Toshkent shahrining Chilonzor tumanida 4 000 quti qalbaki dori vositalarini sotayotgan shaxslar ushlandi.
Izoh (0)