Amerikaning texnogiganti Apple 2027-yilda o‘z mahsulotlari tarixida yangi davrni boshlab beruvchi turli xil innovatsion qurilmalarni taqdim etadi. Bu haqda taniqli texnologiyalar jurnalisti Mark Gurman xabar berdi. Yaqin ikki yil ichida kompaniya iPhone’lar liniyasini tubdan qayta ko‘rib chiqadi, aqlli soatlar va quloqchinlar kabi qurilmalarni modernizatsiya qiladi hamda robotlashtirilgan gadjetlarni ishga tushiradi.
2024-yilda Apple bir qator yangiliklarni namoyish etgan bo‘lsa-da, kompaniya hali ham “tubdan o‘zgartirilgan” qurilmalarni taqdim etmaganlikda tanqid qilinmoqda. Masalan, iPhone 16 bozordagi eng yaxshi smartfonlardan biri bo‘lib qolmoqda, ammo u avvalgi modellardan deyarli farq qilmaydi. Yangi avlod MacBook noutbuklarida innovatsion protsessorlar qo‘llangan, biroq boshqa texnik jihatlar deyarli o‘zgarishsiz qolgan. Shuningdek, Vision Pro garniturasi ham texnologiya olamida yangilik hisoblanadi, ammo u foydalanuvchilar orasida yetarli darajada mashhur bo‘la olmadi, shuning uchun uning kelajagi hozircha noaniq bo‘lib qolmoqda.
Apple tomonidan yangiliklarning yo‘qligi iPhone va Apple Watch savdosiga salbiy ta’sir ko‘rsatdi. Kupertino kompaniyasi yangi mahsulotlar ishlab chiqish sur’atini sezilarli darajada pasaytirdi. Bularning bari texnologiyalar bozori kuchli raqobat bosqichiga kirgan davrda yuz bermoqda. Xiaomi va Huawei kabi Xitoy kompaniyalari turli segmentlarda innovatsion yechimlar bilan tobora faolroq bo‘lmoqda.
Shunga qaramay, Apple’da o‘z vaqtida Nokia, BlackBerry yoki Compaq kabi texnogigantlarning taqdiriga duch kelmaslik uchun barcha resurslar mavjud. Shu sababli kompaniya aynan 2027-yilga kelib ilk iPhone ishlab chiqarilganining 20 yilligi munosabati bilan mutlaqo yangi qurilmalar turkumini taqdim etishi kutilmoqda.
Yangi avlod iPhone’lari
2027-yilgacha ishlab chiqarilishi rejalashtirilgan eng muhim yangiliklardan biri — Apple tarixidagi birinchi bukiluvchi smartfon bo‘ladi. Garchi bunday gadjetlarni boshqa kompaniyalar allaqachon ishlab chiqargan bo‘lsa-da, Apple mahsuloti o‘ziga xos dizayn va texnologiyaga ega bo‘ladi. Jumladan, u elastik titan asosidagi ilg‘or g‘ilof mexanizmi va ekranning markaziy qismida deyarli ko‘zga tashlanmaydigan bukilish chizig‘i bilan ajralib turadi.
Yana bir innovatsion iPhone — butunlay yangi dizaynga ega model bo‘lib, ko‘rinishidan bir parcha shishani eslatadi. Qurilma ramkasiz gadjetga aylanadi. Bu, ehtimol, Apple kompaniyasining 2019-yilgi patentlariga asoslangan dizayn bo‘lib, unda telefon atrofida “uzluksiz halqa hosil qiluvchi” yagona shishadan yasalgan korpus tasvirlangan.
Aqlli ko‘zoynaklar, kamerali soatlar va sun’iy intellektga ega boshqa gadjetlar
2027-yilgacha Apple sun’iy intellekt platformasi — Apple Intelligence funksiyalarini o‘z ichiga oluvchi turli qurilmalarni ishlab chiqadi. Xususan, Meta kompaniyasining Ray-Ban ko‘zoynaklariga raqobat sifatida Apple quyoshdan saqlovchi “aqlli” ko‘zoynaklar taqdim etishi kutilmoqda. Ular maxsus yangi chip, kamera, dinamika va mikrofonlar bilan jihozlanadi va Visual Intelligence texnologiyasi orqali atrof-muhit bilan muloqot qiladi.
Ushbu ko‘zoynaklar ChatGPT yoki Google Search yordamida obyektlarni aniqlay oladi, diqqatga sazovor joylar haqida ma’lumot beradi yoki matn tarjimasi va mahsulot buyurtmasi kabi topshiriqlarni bajaradi.
Visual Intelligence texnologiyasi AirPods quloqchinlari va Apple Watch aqlli soatlariga ham joriy etiladi. Ular ham kameralar bilan jihozlanadi va atrofdagi ma’lumotlarni sun’iy intellekt yordamida tahlil qiladi. Oddiy Apple Watch modeli displey ostidagi datchik bilan, Ultra versiyasi esa yon tomonidagi tugma yaqiniga joylashtirilgan linza bilan jihozlanadi. Foydalanuvchi bilagini obyekt tomon yo‘naltirishi bilan qurilma u haqida ma’lumot beradi.
Robot qurilmalar va sun’iy intellekt rivoji
Bundan tashqari, Apple “aqlli uy” ekotizimini rivojlantirish maqsadida robotlashtirilgan qurilmalar ustida ishlamoqda. 2027-yilgacha kompaniya maxsus mexanik qo‘l va “o‘z shaxsiga ega” sun’iy intellekt bilan jihozlangan uyni boshqarish markazini taqdim etishi mumkin. Shuningdek, kompaniya oila a’zolarni tanib oladigan, uyni kuzatadigan, ichimlik olib kelib beradigan va uy hayvonlarini ovqatlantirish kabi vazifalarni bajara oladigan mobil robot ustida ishlamoqda.
Bundan tashqari, 2027-yilda Apple Intelligence platformasida ikki muhim yangilik kutilmoqda. Birinchisi — sun’iy intellekt imkoniyatlarini kengaytiruvchi yangi, kuchli chiplar bilan jihozlangan AI-serverlar. Ikkinchisi esa Siri ovozli yordamchisi bazasiga yangi tillar modelidir.
2027-yil Apple Intelligence platformasi yana ikkita muhim yangilik bilan ajralib turadi. Birinchidan, sun’iy intellekt imkoniyatlarini oshiradigan yangi va kuchliroq chiplar qo‘llaniladi, ikkinchidan, Siri ovozli yordamchisi uchun ko‘plab yangi til modellari o‘rnatiladi.
Izoh (0)