BAAda foydalanuvchining xohish-istaklari asosida juftlik topishga yordam beradigan sun’iy intellektga ega ilova taqdim etildi. Bu haqda Khaleej Times xabar berdi.
Ilova foydalanuvchilar ma’lumotlarini tahlil qiladi. Undan Birlashgan Arab Amirliklari rezidentlari va fuqarolari foydalana oladi. Platforma foydalanuvchi tomonidan kiritilgan ma’lumotlar asosida mos juftliklarni tanlashda sun’iy intellekt texnologiyalaridan foydalanadi. Bunda Amirliklarning islomiy urf-odatlari va ijtimoiy maxfiylikka qat’iy rioya qilinadi.
Foydalanuvchi ilovaga qanday juftni afzal ko‘rishi haqida ma’lumotlarni kiritadi. Tizim shunga asosan ikkinchi juftni topadi va ikkala tomondan ham tasdiqlashni so‘raydi. O‘zaro kelishuvga ko‘ra, ikkala foydalanuvchi ham o‘z sahifasiga kirib, uchrashish istagini tasdiqlashi lozim.
Uchrashuv kelinning oilasi uyida urf-odatlarga rioya qilgan holda o‘tkaziladi. Dasturchilar maxfiylikni ta’minlashga va’da bermoqda. Shaxsiy ma’lumotlar tomonlar imzolagan yuridik kelishuv asosida uzatiladi.
Obuna narxi 1 099 dirhamni (salkam 300 dollar) tashkil etadi, unga turmush o‘rtoq tanlash uchun to‘rtta urinish kiradi. Profilning amal qilish muddati cheklanmagan. Ilovani yaratish g‘oyasi mamlakat odatlarini e’tiborga olmaydigan tanishuv ilovalari sonining ko‘payishi fonida paydo bo‘lgan.
Izoh (0)