O‘ta yirik miqdordagi firibgarlikda ayblanayotgan fuqaro qo‘lga olindi, deb xabar berdi O‘zbekistondagi Interpol Milliy markaziy byurosi.
Maʼlum qilinishicha, Birlashgan Arab Amirliklarida qidiruvdagi shaxs aniqlandi va O‘zbekistonga qaytarildi.
Fuqaro O‘zbekiston huquqni muhofaza qilish organlari tashabbusi bilan o‘ta yirik miqdordagi firibgarlikda ayblanib, xalqaro qidiruvda bo‘lgan. Ushbu holat yuzasidan jinoyat ishi qo‘zg‘atilgan, ayblanuvchi chet elga qochib, tergovdan yashiringan va xalqaro qidiruvga eʼlon qilingan.
Qidiruvdagi shaxs BAA hududida ushlandi va keyingi tergov tadbirlarini o‘tkazish uchun O‘zbekistonga chiqarib yuborildi.
Sankt-Peterburgda 2021-yilda sodir etilgan qotillik uchun qidiruvda bo‘lgan O‘zbekiston fuqarosi 28-may kuni Salvadordan ekstraditsiya qilingandi. O‘zbekistonda 9 million dollarni talon-toroj qilishda ayblangan shaxs Rossiyada ushlanib, 15-mayda O‘zbekistonga ekstraditsiya qilingandi. Shuningdek, O‘zbekiston Interpol Milliy markaziy byurosi xalqaro qidiruvda bo‘lgan jinoyatchi ayolni BAAdan chiqarib yuborgandi.
Izoh (0)