Rossiya Istanbuldagi mehmonxona egasini o‘ldirishda gumonlangan O‘zbekiston fuqarosini Turkiyaga ekstraditsiya qildi. Bu haqda Rossiya IIV matbuot xizmati xabar berdi.
“Rossiya IIV Interpol milliy markaziy byurosi va Federal jazoni ijro etish xizmati xodimlari Vnukovo xalqaro aeroportida Turkiya huquq-tartibot organlari vakillariga O‘zbekiston fuqarosi Xasanjon Aminovni topshirdi”, — deyiladi xabarda.
Aminov qasddan odam o‘ldirishda ayblanib, Interpol kanallari bo‘yicha qidiruvda bo‘lgan. Turkiyalik tergovchilarning versiyasiga ko‘ra, u 2019-yilda sheriklari bilan Istanbuldagi mehmonxona egasini o‘ldirgan. O‘zbekiston fuqarosi mazkur mehmonxona xodimi bo‘lib ishlagan.
2023-yilda erkak Qozonda qo‘lga olingandi, yil oxirida esa Rossiya prokuraturasi ayblanuvchini Turkiya tomoniga topshirishni ma’qullagan.
Ekstraditsiya holatlari
2023-yilning mart o‘rtalarida Latviyada o‘zini elchixona xodimi sifatida tanishtirib, odamlarni chuv tushirib yurgan O‘zbekiston fuqarosi ekstraditsiya qilingani to‘g‘risida xabar berilgandi. Shuningdek, mart oxirlarida Interpolning O‘zbekistondagi Milliy markaziy byurosi xodimlari tomonidan xalqaro qidiruvda bo‘lgan shaxsni ekstraditsiya qilish Shvetsiyadan birinchi marta amalga oshirildi.
Aprel boshida Moskva shahrida 13 yil oldin O‘zbekistonda sodir etgan jinoyati uchun xalqaro qidiruvda bo‘lgan shaxs qo‘lga olingandi. Oy o‘rtalarida bo‘lsa, Qirg‘izistonda terrorchilik tashkilotiga a’zolikda gumonlanib, ikki o‘zbekistonlik hibsga olingan edi.
Izoh (0)