Odam savdosi uchun qidirilayotgan o‘zbekistonlik ayol Istanbuldan Toshkentga ekstraditsiya qilindi, deb xabar bermoqda IIV.
Keltirilishicha, O‘zbekistondagi Interpol Milliy markaziy byurosi xodimlari kuzatuvida, Interpol kanallari orqali huquqni muhofaza qiluvchi organlar tomonidan odam savdosi uchun qidirilayotgan va uzoq vaqt davomida Turkiya hududida yashirinib yurgan o‘zbekistonlik ayol Istanbuldan Toshkentga ekstraditsiya qilindi.
Jinoyatchi ayol sotish va ekspluatatsiya maqsadida qizlarga yuqori maosh va’da qilib, ularni Turkiyaga olib borgan. U yerda qizlarning pasportlarini tortib olib, ularni fohishalik bilan shug‘ullanishga majburlagan.
Interpolning Toshkent va Anqara Milliy markaziy byurolari o‘rtasida olib borilgan hamkorlikdagi sa’y-harakatlar va tezkor-axborot kuzatuvi natijasida jinoyatchining qayerdaligi aniqlandi va u qamoqqa olindi.
O‘zbekiston Bosh prokuraturasining iltimosnomasi Turkiya vakolatli organlari tomonidan qanoatlantirilganidan so‘ng, qidiruvdagi shaxs topildi va Interpol Milliy markaziy byurosi xodimlari kuzatuvida keyingi tergov harakatlarini o‘tkazish uchun O‘zbekistonga olib kelindi.
Sankt-Peterburgda 2021-yilda sodir etilgan qotillik uchun qidiruvda bo‘lgan O‘zbekiston fuqarosi 28-may kuni Salvadordan ekstraditsiya qilingandi. O‘zbekistonda 9 million dollarni talon-toroj qilishda ayblangan shaxs Rossiyada ushlanib, 15-mayda O‘zbekistonga ekstraditsiya qilingandi. Shuningdek, O‘zbekiston Interpol Milliy markaziy byurosi xalqaro qidiruvda bo‘lgan jinoyatchi ayolni BAAdan chiqarib yuborgandi.
Izoh (0)