Qozog‘iston fuqarosi o‘z mamlakatida jinoiy guruhga a’zo bo‘lish, giyohvand moddalar savdosi va kontrabandada ayblanib Rossiyadan ekstraditsiya qilindi. Bu haqda Tengrinews xabar berdi.
Ma’lumotlarga ko‘ra, gumonlanuvchi 2003-yilda O‘zbekiston orqali Qozog‘iston va Rossiyaga giyohvand moddalar (geroin va opiy) olib o‘tuvchi jinoiy guruh faoliyatida qatnashgan. U giyohvand moddalarni tashish, saqlash va guruh a’zolariga topshirish ishlarini bajarib kelgan.
2003-yilda Qizilo‘rda va Qarag‘anda viloyatlarida o‘tkazilgan maxsus operatsiyalar davomida bir qator jinoyatchilar ushlangan va 35 kilogram geroin hamda 28 kilogram opiy musodara qilingan. Guruh a’zolarining ba’zilari sudlangan, lekin gumon qilinuvchi politsiyadan qochib, xalqaro qidiruvga berilgan. 20 yildan so‘ng, 2024-yil dekabrida Rossiyaning Samara viloyatida ushlangan va Qozog‘iston prokuraturasi talabiga binoan ekstraditsiya qilingan. Hozirda u hibsda saqlanmoqda. Unga 10-15 yillik qamoq va mulkni musodara qilish jazosi berilishi mumkinligi aytilmoqda.
Izoh (0)