Komil Allamjonovga suiqasd bo‘yicha 10 kishiga nisbatan sud hukmi e’lon qilindi. Bu haqda Oliy sud matbuot xizmati xabar berdi.
E’lon qilingan sud hukmiga muvofiq Komil Allamjonovga suiqasd tashkilotchiligida ayblangan Javlon Yunusov 18 yilga ozodlikdan mahrum qilindi. Javlon Yunusov Interpol tomonidan qidiruvga berilib, Janubiy Koreya Respublikasida qo‘lga olingan va O‘zbekistonga ekstraditsiya qilingandi.
Shuhrat Rasulov 23 yilga ozodlikdan mahrum qilindi. “Daryo”ga ma’lum bo‘lishicha, u muqaddam Prezident davlat xavfsizlik xizmati o‘z xavfsizligi boshqarmasi boshlig‘i lavozimida ishlagan, Komil Allamjonovga suiqasd buyurtmachisi sifatida qo‘lga olingandi.
Shohrux Ahmedov va Ismoil Jahongirov 23 yilga ozodlikdan mahrum qilindi. Ular Allamjonovga suiqasd ishi bo‘yicha ijrochi ekanligini tan olib, video tarqatgandi.
Doniyor Toshxo‘jayevga 7 yil muddatga ozodlikdan mahrum qilish jazosi tayinlandi.
U 2023-yilning avgustidan Toshkent shahar IIBB boshlig‘ining birinchi o‘rinbosari lavozimida ishlab kelayotgandi. 2024-yilning noyabrida ushbu lavozimdan olindi. U tergov jarayoniga xalaqit qilgan bo‘lishi mumkin.
Qolgan 5 nafar sudlanuvchiga qilmishiga muvofiq ravishda turli muddatlarga ozodlikdan mahrum qilish jazolari tayinlandi.
Komil Allamjonovga uyushtirilgan suiqasd
Prezident administratsiyasi Axborot siyosati departamentining sobiq rahbari Komil Allamjonovga qurolli hujum 2024-yil 26-oktyabr tunda uyushtirilgandi. Range Rover rusumli avtomashina Qibray tumani, Ifor ko‘chasi bo‘ylab harakatlangan vaqtida ikki nafar nomaʼlum shaxs mashinaga o‘qotar quroldan bir necha marotaba o‘q uzib, nomaʼlum tomonga yashiringan. Hujum oqibatida biror-bir shaxs tan jarohati olmagan. Holat yuzasidan Jinoyat kodeksining 25,97-moddasi (qasddan odam o‘ldirishga suiqasd qilish) bilan jinoyat ishi qo‘zg‘atildi.
27-oktyabr kuni gumonlanuvchilarning biri ushlandi. 28-oktyabr kuni yana uch nafar gumonlanuvchi qo‘lga qolindi. Noyabr oyida esa suiqasdda gumonlanib yana 5 kishi qamoqqa olindi. Yana 2 kishiga nisbatan qidiruv eʼlon qilindi.
27-dekabr kuni Bosh prokuratura Komil Allamjonovga nisbatan sodir etilgan qotillikka suiqasd qilish bilan bog‘liq jinoyat ishi doirasida Chechenistonda yashaydigan ikki Rossiya fuqarosi — Bislan Rasayev va Shamil Temirxanov Jinoyat kodeksining tegishli moddalari bilan sirtdan ayblanuvchi tariqasida jalb qilinganini e’lon qildi. Ular qonunga xilof ravishda O‘zbekistonga kirish va chiqish, jinoyat haqida xabar bermaslik hamda o‘qotar qurolning qonunga xilof muomalasi kabi jinoiy harakatlarni sodir etgani aniqlangan.
10-yanvar kuni inson huquqlari faoli Abdurahmon Tashanov Komil Allamjonovga suiqasd ishi yuzasidan harbiy sudda mahkama boshlanganini ma’lum qildi.
Izoh (0)