Italiya politsiyasi Rimda “Islom davlati” terrorchilik guruhining Tojikiston fuqarosi bo‘lgan aʼzosini qo‘lga oldi. Bu haqda ANSA agentligi xabar berdi.
Rim politsiyasi bosh boshqarmasiga ko‘ra, 32 yoshli Ilhomi Sayrahmonzoda Niderlandiyaning Eyndxoven shahridan uchib kelgan samolyotda Fyumichino aeroportida qo‘lga olingan. U 2014-yilda Suriyadagi janglarda qatnashgani uchun Tojikiston tomonidan xalqaro qidiruvga berilgan.
Ta‘kidlanishicha “u terrorchilik tashkilotning faol aʼzosi bo‘lib, turli taxalluslar va tug‘ilgan sanalari orqali o‘zini O‘zbekiston, Qirg‘iziston yoki Ukraina fuqarosi sifatida ko‘rsatib, huquq-tartibot idoralaridan yashiringan”.
Erkak soat 11:45 da Fyumichinoga qo‘ndi, u Eyndxovendan soxta guvohnoma bilan kelgan. Politsiya uning barmoq izlarini oldi va u Tojikiston talabiga binoan Interpol tomonidan qidirilayotgan shaxsligi aniqlandi. Erkakning aeroportidagi harakati, uni kimdir kutayotganini bilish uchun kuzatildi. Ammo u Rimga olib boruvchi poyezd tomon yolg‘iz harakatlanganda ofitserlar jarayonga aralashdi. Undan mobil telefon va ikki ming yevroga yaqin naqd pul olib qo‘yildi, — deyiladi xabarda.
Tergovchilar tojikistonlikning mobil telefonini tahlil qilish natijasida erkakning italiyalik aloqalarini aniqlanishni rejlashtirmoqda.
Uning Rimga kelishi tashvishli savollarni ochib beradi: u bu yerda biror narsani rejalashtirganmi? U ilgari kimnidir yollaganmi? Uni kutishganmidi? Uning fuqaroligi 22-mart kuni Crocus City Hall terakti bilan bog‘liq yuqori keskinlik tufayli hibsga olinishida asosiy omil bo‘lgan. Biroq hozircha uning ushbu harakatga aloqadorligini ko‘rsatadigan hech qanday elementlar yo‘q, — deyiladi bayonotda.
Ayni paytda Tojikistonning uni ekstraditsiya qilish haqidagi iltimosi ham ko‘rib chiqilmoqda. Italiya ichki ishlar vaziri Matteo Piantedosining taʼkidlashicha, hibsga olish “juda muhim natija, terrorchilik tahdidiga qarshi samarali profilaktika faoliyati samarasidir”.
Bu boshqa mamlakatlar politsiyasi bilan o‘zaro manfaatli hamkorlikning tasdig‘idir, — deya qo‘shimcha qildi u.
Uning so‘zlariga ko‘ra, o‘tgan yilning 7-oktyabridan buyon xavfsizlik nuqtai nazaridan Italiyadan 50 dan ortiq odam chiqarib yuborilgan.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)