Madridning “Real” klubi hujumchisi Rodrigo Goes “Pari Sen-Jermen” safiga o‘tishi mumkin. Garchi yozgi transfer oynasi vaqtida parijliklar braziliyalik futbolchiga qiziqish bildirgani haqida xabarlar tarqalgan bo‘lsa-da, hozircha transfer amalga oshgani yo‘q.
Ayni payt “PSJ” Rodrigoning transferi ustida faol ish olib bormayapti, ammo futbolchining nomzodi zaxira variant sifatida ko‘rib chiqilmoqda. Bu holat Bredli Barkolyaning kelajagiga bog‘liq bo‘ladi. Agar fransiyalik futbolchi klubni tark etsa, Rodrigo uning o‘rnini egallashi mumkin. Bu haqda taniqli insayder Fabrisio Romano xabar berdi.
Ma’lumotlarga ko‘ra, Barkolya bosh murabbiy Luis Enrike qo‘l ostida muntazam o‘yin amaliyotiga ega emas. Ushbu vaziyat fonida “Liverpul” futbolchini o‘z safiga qo‘shib olish ustida ish olib bormoqda.
Rodrigo “Real Madrid”da qolishga qaror qilgan. Ammo top darajadagi klubdan jiddiy taklif tushsa va uning asosiy tarkibdagi o‘rni kafolatlansa, futbolchi klubdan ketish haqida o‘ylab ko‘rishi mumkin.
- Rodrigo o‘tgan mavsum “qirollik klubi” safida 54 ta o‘yinda maydonga tushib, 14 ta gol va 11 ta golli uzatmaga mualliflik qilgan.
- Futbolchining “Real Madrid” bilan amaldagi shartnomasi 2028-yil yozigacha amal qiladi.
- Transfermarkt portali 24 yoshli hujumchining bozor qiymatini 90 million yevroga baholagan.
Izoh (0)