Turkiyaning Bolu viloyatidagi og‘ir jinoyatlar sudi 78 kishining hayotiga zomin bo‘lgan “Kartalkaya” mehmonxonasidagi yong‘in ishi bo‘yicha ayblov xulosasini qabul qildi. Ish bo‘yicha 32 kishi, jumladan, mehmonxona egasi va shahar amaldorlari ayblanuvchi sifatida ishtirok etmoqda. Bu hada NTV telekanali xabar bermoqda.
Prokuratura 13 kishi, shu jumladan mehmonxona egasi uchun “ehtimoliy qasddan qotillik” va “ehtimoliy qasddan sog‘liqqa zarar yetkazish”ning 78 ta holati bo‘yicha jami 1998 yilgacha qamoq jazosini talab qilmoqda.
Yana 19 kishi “ehtiyotsizlik oqibatida bir necha kishining o‘limi va sog‘lig‘iga zarar yetkazishda” ayblanib, ularga 22,5 yilgacha ozodlikdan mahrum qilish jazosi tahdid solmoqda.
Bolu bosh prokuraturasi tomonidan tayyorlangan 98 sahifali ayblov hujjati Boluning 1-sonli og‘ir jinoyatlar sudiga yuborilgan. Ayblanuvchilarga nisbatan sud jarayoni yaqin kunlarda boshlanadi.
Ayblov xulosasida ko‘rsatilishicha, ayblanuvchilar orasida mehmonxona egalari, boshqaruv a’zolari va kompaniya rahbarlari, shuningdek, Bolu shahar hokimi o‘rinbosari, shahar yong‘in xavfsizligi xizmati boshlig‘i o‘rinbosari va o‘t o‘chiruvchi bor.
Yong‘in 21-yanvar kuni “Grand Kartal” mehmonxonasining restoran qismida yuz bergan. O‘sha paytda binoda 237 kishi bo‘lgan. Rasmiylar va mutaxassislarning dastlabki baholashiga ko‘ra, mehmonxonada yong‘inga qarshi zaruriy xavfsizlik choralari ko‘rilmagan. Sabah gazetasining xabar berishicha, yong‘in grilni o‘chirmagan xodimlarning xatosi tufayli kelib chiqqan bo‘lishi mumkin.
Sodir bo‘lgan fojiali yong‘in 78 mehmonning hayotiga zomin bo‘ldi, 50 dan ortiq kishi turli darajadagi tan jarohatlari va kuyishlar oldi.
Ayblov xulosasiga ko‘ra, hodisa sodir bo‘lgan kechasi mehmonxona oshpazi, nonushta xizmatini ko‘rsatuvchi Feysal Yaver, mehmonxonaning to‘rtinchi qavatidagi restoranda "gril-plastina" deb ataladigan elektr panjarani yoqqan. Aniqlanishicha, yong‘in yuz bergunga qadar ulab qo‘yilgan asbobning o‘rta termostati kuchli korroziya tufayli ishlamay qolgan, natijada asbob haddan tashqari qizib ketgan.
Qurilmaning qizishi oqibatida to‘r o‘tkazgichlarining eskirishi va yemirilishi tufayli qisqa tutashuv yuz bergan. Yong‘in soat 03:17 da boshlangan, bunda qisqa tutashuv tok o‘tkazgichning himoya elementlari tomonidan bartaraf etilmagani sababli qurilmaning gril qismidagi hayvon yog‘lari bug‘lanib yonib ketgan va "gril-plastina" qurilmasining ichki kamerasida kichik chaqnash bilan alanga olgan.
Soat 03:24 da yong‘in yonish kamerasidan yaqin atrofdagi axlat idishiga, u yerdan esa suyultirilgan neft gazini uzatish shlangiga tarqalgan. Alanga shlangni eritib, suyultirilgan neft gazini yondirishi natijasida tez tarqalayotgan yong‘in 03:26 da “boshqariladigan chegaralardan chiqib ketgan” va alanganing rangi ko‘kka o‘zgara boshlagan. Keyinchalik shiftga qoplangan OSB lokli plitalar va yog‘och qoplamalar tez gaz hosil bo‘lishiga sabab bo‘ldi, bu esa o‘z navbatida haddan tashqari tutun chiqishiga va olovning tez tarqalishiga olib kelgan.
Izoh (0)