Turkiya prezidenti Rajab Toyyib Erdo‘g‘on o‘n nafar huquqshunosdan iborat ekspertlar guruhi yangi konstitutsiya ustida ishlashga jalb etilganini aytdi. Bu haqda TRT Global xabar berdi.
Men o‘n nafar huquqshunosga loyihani tayyorlashni topshirdim. Ularning faoliyati bilan konstitutsiyaviy ishlarni boshlaymiz, dedi Erdo‘g‘on.
U asosiy maqsad — harbiy to‘ntarishlar davrining izlaridan xoli bo‘lgan yangilangan konstitutsiyani yaratish ekanini ta’kidladi.
1982-yilgi konstitutsiya harbiy rejim izlarini o‘zida aks ettirgan. Yangi, fuqarolik konstitutsiyasi bu qoldiqlardan xalos bo‘lish va o‘tmishning og‘ir yukini tashlash imkonini beradi, deb ta’kidladi u.
Prezident Turkiya hukumati “yangi konstitutsiyani huquq tizimiga to‘liq va keng qamrovli erkinliklar xartiyasi sifatida kiritishga qat’iy ahd qilganini” aytdi. U bu jarayonda boshqa parlament partiyalari ham ishtirok etishiga umid bildirdi.
Erdo‘g‘on 1960-yil 27-maydagi to‘ntarishni “Turkiya demokratiyasi tarixidagi eng qora sahifalardan biri” deb atadi. Shuningdek, u katta mas’uliyat talab qiladigan terrorsiz Turkiyani ta’minlash bo‘yicha ishlarning yangi bosqichi boshlanganini aytdi.
Har bir yangi bosqich bilan nafaqat umidimiz, balki mas’uliyatimiz ham ortib bormoqda, deya qo‘shimcha qildi u.
Turkiya prezidenti 2024-yil amaldagi konstitutsiyani “harbiy to‘ntarish natijasi” deb atagandi. U mamlakatdagi ayrim siyosiy kuchlar iqtisodiy va ijtimoiy muammolarni aytib, yangi konstitutsiya masalasini kun tartibidan olib tashlashga harakat qilayotganini aytgandi.
Izoh (0)