Kasallanganlar va vafot etganlar
Amerikalik aktyor Tom Xenks va uning rafiqasi Rita koronavirus infeksiyasi bilan kasallandi. Bu haqda aktyorning o‘zi Twitter’dagi sahifasida xabar qoldirgan.
“Hammasini to‘g‘ri qilish uchun — hozir shunday qilish shart — biz koronavirusga tahlil topshirdik”, — deb yozgan Xenks. Uning so‘zlariga ko‘ra, tahlil natijalari ularda koronavirus infeksiyasi borligini ko‘rsatgan.
Janubiy Koreyada so‘nggi bir sutka ichida koronavirus infeksiyasini yuqtirib olish bilan bog‘liq 114 ta yangi holat qayd etildi. Mart oyidan buyon kasallanganlarning umumiy soni 7869 kishiga, qurbonlar soni esa 66 kishiga yetdi.
Armanistonda koronavirus bilan kasallanish bo‘yicha uchta yangi holat qayd etildi. “Afsuski, bugun mamlakatda koronavirus yuqtirib olish bo‘yicha uchta yangi holat kuzatildi. Ikki nafar (ularning yoshi mos ravishda 45 va 27 da) Armaniston fuqarosi hamda mamlakatda ishlovchi Italiya fuqarosida (51 yosh) kasallik borligi aniqlangan. Uchala odamning ham yaqinda Italiyadan kelgani ma’lum bo‘ldi”, — deb yozgan Armaniston bosh vaziri Facebook’dagi sahifasida.
Xitoy hududida koronavirusni yuqtirganlarning umumiy soni 80 793 kishini tashkil etib, ulardan 62 793 nafari sog‘ayishga muvaffaq bo‘lgan. Epidemiya mamlakatning 3169 fuqarosini hayotdan olib ketgan. So‘nggi kunlarda butun mamlakat bo‘ylab koronavirusga chalinish bilan bog‘liq 15 ta yangi holat aniqlangan. Ulardan oltitasida koronavirus Xitoy tashqarisida yuqtirilgan, yana sakkizta holat esa Xubeyda qayd etilgan.
O‘zbekistondagi vaziyat
O‘zbekiston Prezidenti Shavkat Mirziyoyev 11-mart, chorshanba kuni, mamlakatda jamoat salomatligini ta’minlash tizimi samaradorligini oshirish muhokamasiga bag‘ishlangan yig‘ilish o‘tkazdi.
Koronavirus haqida xalqimiz bilishi kerak. Butun dunyo bo‘ylab 100 dan ortiq davlatda alomatlari aniqlandi, desak to‘g‘ri bo‘ladi. Mana, Yevropada juda kuchayib ketyapti. Shuning uchun koronavirusga qarshi e’tiborni ikki karra ko‘paytirmasak, ogoh bo‘lmasak, bu xavf-xatar iqtisodiyotniyam, siyosatniyam joy-joyiga qo‘yadigan vaqt kelgan.Yig‘ilishda davlat rahbari koronavirusga qarshi kurash bo‘yicha Sog‘liqni saqlash vazirligi hamda Sanitariya-epidemiologik osoyishtalik agentligiga bir qator topshiriqlar bergan.Shavkat Mirziyoyev, O‘zbekiston Prezidenti
O‘zbekiston Rossiyadan koronavirusni aniqlovchi test tizimlarini oldi. Qayd etilishicha, koronavirus tarqalishi munosabati bilan Rospotrebnadzor epidemiologik vaziyatni monitoring qilish va yordamga muhtoj davlatlarga ko‘mak berish maqsadida Yevrosiyo iqtisodiy ittifoqi (YeOII)ga a’zo mamlakatlar, O‘zbekiston, Ozarbayjon, Tojikiston, Turkmaniston, Mo‘g‘uliston, Xitoy va Eronga test tizimlarini bepul yuborgan.
Jahon sog‘liqni saqlash tashkilotining O‘zbekistondagi vakolatxonasi rahbari Lianne Kuppens “O‘zbekistonga koronavirusning kirib kelish ehtimoli yuqori ekanini qayd etdi. Kuppensning so‘zlariga ko‘ra, ayni vaqtda O‘zbekistondagi aholi vakillarida koronavirusga chalinish holatlari aniqlanmagan. “Virus yuqumli bo‘lgani va 6 ta qit’ani zararlagani sababli uning yaqin orada O‘zbekistonga kirib kelishi ehtimoli yuqori”, — deya ta’kidlagan JSST vakili.
Rossiyaning Yahudiy avtonom viloyatida bahorgi dala ishlariga jalb qilinishi rejalashtirilgan xitoylik ishchilar o‘rnini koronavirus sababli o‘zbekistonlik ishchilar egallaydi. Qayd etilishicha, viloyat rasmiylari koronavirus sababli bahorgi dala ishlariga kela olmaydigan 1,3 ming nafar xitoylik ishchi o‘rniga o‘zbekistonlik ishchilarni jalb qilishni rejalashtirmoqda.
Jahondagi vaziyat
Qozog‘istonda o‘tkazilishi rejalashtirilgan ommaviy tadbirlar koronavirus tufayli bekor qilinadi. “JSST koronavirus pandemiyasini e’lon qildi. Hukumat maxsus profilaktika choralarini amalga oshirishga kirishdi. Ommaviy tadbirlar bekor qilinadi. Oziq-ovqat va birinchi ehtiyoj uchun zarur bo‘lgan tovarlar bilan ta’minlashda uzilishlar bo‘lmaydi. Kichik va o‘rta biznes zarar ko‘rishining oldini olish muhim”, — deb yozadi To‘qayev Twitter’da.Shuningdek, koronavirus xavfi tufayli Qozog‘istonda maktab o‘quvchilari muddatidan avval ta’tilga chiqadigan bo‘ldi. Bu haqda bosh vazir o‘rinbosari Erali Tugjanov ma’lum qilgan.
Qirg‘iziston bosh vaziri mamlakatda koronavirus tarqalishining oldini olish maqsadida ommaviy tadbirlar o‘tkazishni taqiqlash bo‘yicha qaror imzoladi.
Turkiya hukumati turoperatorlarga 2019-nCoV koronavirusi tarqalishi munosabati bilan sayyohlik mavsumini boshlashga shoshilmaslikni tavsiya qildi. Mamlakat turizm va madaniyat vazirligi mehmonxona va sayyohlik firmalariga mavsumni mart oyidan emas, aprel oyi oxiridan boshlashni taklif qildi.
Eron hukumati Xalqaro valyuta jamg‘armasiga (XVJ) koronavirus epidemiyasi tufayli 5 milliard dollar berishni so‘rab, murojaat qildi.
AQShda yangi turdagi COVID-19 koronavirusining tarqalishi sabab Yevropa mamlakatlaridan keluvchilar uchun 30 kunga vaqtinchalik taqiq o‘rnatildi. Taqiq Buyuk Britaniya uchun istisno qilinadi. “Yangi tartib-qoidalar 13-mart kuni yarim tundan kuchga kiradi”, — deydi Tramp.
Jahon sog‘liqni saqlash tashkiloti rahbari Tedros Gebreyesus koronavirus bilan bog‘liq vaziyat pandemiya darajasiga chiqqanini ma’lum qildi. So‘nggi ikki hafta davomida Xitoydan tashqarida koronavirus bilan zararlanish holatlari soni 13 martaga oshdi, kasallik qayd etilgan mamlakatlar soni esa uch baravar ko‘paydi.
Ma’lumot uchun, pandemiya epidemik kasallikning bir yoki bir necha mamlakat, qit’a yoki kontinentda yoppasiga tarqalishi hisoblanadi. Pandemik tarqalish havo-tomchi yo‘li bilan yuqib, inkubatsion davri qisqa yuqumli kasalliklarga xos.
Ko‘rishni qat’iy tavsiya qilamiz: Koronavirus bo‘yicha majlis o‘tkazgan Mirziyoyev, 10 ming kishini boshpanasiz qoldirgan yong‘in, Fukusima fojiasining 9 yilligi. 11-mart suratlari
Turinning “Yuventus” klubi himoyachisi Daniele Rugani koronavirus bilan og‘rigani aniqlandi. 25 yoshli Rugani koronavirus bo‘yicha test topshirgan va test natijalari ijobiy natija taqdim etgan.
Shunigdek, koronavirus sabab “Inter” hamda “Roma”ning Yevropa Ligasidagi o‘yinlari qoldirildi. Mazkur ikki bahs 12-mart, payshanba kuni, o‘tkazilishi kerak edi.
Italiyada koronavirus sabab do‘konlar, bar va restoranlar yopiladi. Sotuvda faqat oziq-ovqat va dori-darmon qoladi. “Boshqarish — 360 darajada atrofni ko‘ra bilish degani. Ushbu chaqiruv fuqarolarimiz sog‘lig‘iga bog‘liq ekanligini yaxshi bilamiz. Bu chaqiruv sog‘liqni saqlash tizimimiz uchun qattiq sinov bo‘lmoqda”, — deydi bosh vazir o‘z murojaatida.
La Liga o‘yinlari ikki haftaga to‘xtatildi. Bunga “Real” klubi karantinga olingani sabab qilib ko‘rsatilmoqda. Madridliklar klubi rasmiy saytining ma’lum qilishicha, “Real” basketbol jamoasining a’zosi COVID-19 virusini yuqtirib olgan. Shu sababli “Real”ning basketbol va futbol jamoalari karantinga olingan.
Umuman olganda, koronavirus sabab dunyo bo‘ylab sport musobaqalari bekor qilinmoqda. Quyida shu kunga qadar bekor qilingan xalqaro sport musobaqalari, shuningdek, koronavirusning umuman sport sohasiga ta’siri haqida so‘nggi ma’lumotlar taqdim etiladi.
Moskva meriyasi koronavirus sabab kuzatuvga olingan odamlar soni haqida ma’lumot berdi. “Ular nafaqat yaqin do‘st va qarindoshlar, samolyot reyslarining yo‘lovchilari, shuningdek, taksi haydovchilari, kuryerlar va boshqa kasb vakillari”, — deya vaziyatga izoh bergan Moskva shahri meri o‘rinbosari Anastasiya Rakova.
Kuvayt hukumati yangi turdagi koronavirusning tarqalish xavfi munosabati bilan vazirlik va davlat tashkilotlari faoliyatini 12—26-mart oralig‘ida to‘xtatib turishga qaror qildi. Hukumat bayonotidan so‘ng mamlakat banklar assotsiatsiyasi ham ko‘rsatilgan muddatda banklar ham ishlamasligini ma’lum qildi.
Har kuni kechqurun faqat bitta xabar jo‘natamiz. “Daryo” oqshomi — kun davomida ro‘y bergan barcha voqea-hodisalar dayjesti Telegram-kanali: @daryooqshomi
Izoh (0)