Toshkent viloyatida 22 yoshli qizni Rossiyaga fohishalik uchun olib ketayotgan ayol qo‘lga olindi. Bu haqda viloyat IIBB matbuot xizmati xabar berdi.
Maʼlum qilinishicha, Angren shahrida yashovchi 1971-y.t. ayol (X.T.) o‘ziga tanish bo‘lgan 2003-y.t. qiz (Z.A.)ni aldab, mo‘may daromad topishga ishontirib, Toshkent xalqaro aeroporti orqali Rossiyaning Sankt-Peterburg shahriga fohishalik uchun olib ketayotgan vaqtida bilan ushlangan.
Maʼlumotlarga ko‘ra, ayol va 22 yoshli qizning Rossiyaga borish uchun yo‘l haqi va boshqa xarajatlari Sankt-Peterburgda yashovchi Zulya ismli ayol tomonidan qoplangan.
Buning evaziga qiz keyinchalik fohishalik bilan shug‘ullanishi kerak bo‘lgan. Shuningdek, ayol qizni yetkazgani uchun Zulyadan maʼlum miqdorda haq olishga kelishgan.
Hozirda ushlangan shaxsga nisbatan Qibray tumani IIB huzuridagi Tergov bo‘limi tomonidan Jinoyat kodeksining 135-moddasi (odam savdosi) 2-qismi “a”, “z” bandlari bilan jinoyat ishi qo‘zg‘atilgan. Tergov harakatlari olib borilmoqda.
Odam savdosi jinoyati uchun jazo choralari kuchaytirilayotgani munosabati bilan Jinoyat kodeksining 135-moddasiga o‘zgartirish kiritish to‘g‘risidagi qonun 2024-yil 17-sentyabrda Qonunchilik palatasida qabul qilinib, Senat tomonidan 2024-yil 21-dekabrda ma’qullangandi. Qonun rasmiy e’lon qilingan kundan e’tiboran kuchga kirdi.
IIV ma’lumotlariga ko‘ra, O‘zbekistonda 2024-yilda odam savdosi jinoyatini sodir etgan 219 nafar shaxsga nisbatan qonuniy choralar ko‘rilishi ta’minlangan.
Izoh (0)