Turkiyaning Izmir shahrida chet eldan kelgan ayollarni fohishalik bilan shug‘ullanishga majbur qilgan olti nafar gumonlanuvchi qo‘lga olindi, 8 ayol jinsiy qullikdan qutqarildi.
Haberlar nashrining yozishicha, politsiya shaharda ayrim chet ellik ayollar fohishalik bilan shug‘ullanishga majbur qilinayotgani haqida ma’lumot olgan.
Huquq-tartibot xodimlari 4 oy davomida gumonlanuvchilar izidan kuzatuv olib borgan. Ma’lum bo‘lishicha, jinsiy qullikda saqlangan ayollar Rossiya, Ukraina, O‘zbekiston va Qirg‘izistondan kelgan fuqarolar bo‘lib, ular kaltaklanib, bosim o‘tkazish orqali fohishalikka majburlangan.
Turli manzillar bo‘yicha olib borilgan tezkor operatsiyalar davomida 8 nafar gumonlanuvchi qo‘lga olingan. Tadbir davomida qutqarilgan 8 nafar ayol o‘z vatanlariga qaytish masalasini hal qilish uchun viloyat migratsiya idorasiga yuborilgan.
Eslatib o‘tamiz, 2019-yilning noyabr oyida Turkiyada fohishalik qilgan o‘zbekistonlik ayollar qo‘lga olinib, mamlakatdan deportatsiya qilingandi. 2020-yilning sentabr oyida esa Toshkentda qizlarni Turkiyaga fohishalik qilishga jo‘natmoqchi bo‘lgan ayol qo‘lga olingani haqida xabar berilgan edi.
Izoh (0)