O‘zbekistonda havo hafta davomida quyoshli va sovuq bo‘ladi. 26-noyabr, seshanba kunidan boshlab havo harorati ayniqsa kechasi keskin sovishi, -8 darajagacha, ayrim joylarda hatto -12 darajagacha sovishi kutilmoqda. Shu munosabat bilan Yo‘l harakati xavfsizligi bosh boshqarmasining haydovchilarga murojaati bilan tanishish foydadan xoli emas. Sirpanchiq yo‘llarda ehtiyot bo‘ling!
Jizzaxda 15 yoshli (9-sinfda) o‘quvchi qiz ona bo‘lgani haqida xabar berilgan edi. Endi u o‘qiydigan maktab ma’muriyati ishonish qiyin bo‘lgan gaplarni aytyapti: tibbiy ko‘riklar vaqtida hammasi joyida bo‘lganmish, o‘qituvchilar uning homiladorligini bildiradigan birorta belgini sezishmaganmish (qanday qilib sezmaslik mumkin ekan-a, tavba?). Maktab direktori o‘rinbosarining aytishicha (uning gaplariga ishonmaslik uchun esa sabab yo‘q), qiz namunali o‘quvchilardan biri bo‘lgan. “Bu holat zo‘ravonlik oqibati, deb o‘ylayman”, — debdi u.
O‘zbekistonda Chevrolet Equinox’ning dastlabki suratlari paydo bo‘ldi. Aytishlaricha, yangi model O‘zbekistonda 2020 yil ikkinchi choragi — aprel—iyun oylarida sotuvga chiqarilishi kutilmoqda. Uning narxi Chevrolet Trailblazer’nikidan (taxminan 38 ming dollar) pastroq, biroq Chevrolet Malibu’nikidan (taxminan 29—34 ming dollar)dan sal yuqoriroq bo‘lishi kutilmoqda. O‘zi, umuman olganda, shu Malibu’ning sal kattaroq, balandroq va universal versiyasi, deyishyapti. UzAuto Motors yangi arzon avtomobillarni qachon chiqarishi haqida hozircha xat-xabar yo‘q.
Ishkallar. Toshkentda militsiya va Milliy gvardiya xodimlari bir qizni bazo‘r, deyarli sudrab olib ketayotgani aks etgan video tarqalgan edi — videodagi qiz bungacha fohishalik bilan shug‘ullangani va militsiya xodimlarining qonuniy talablariga bo‘ysunmagani uchun 18 marta (!) javobgarlikka tortilgan ekan. Rossiyada tarqalgan ikkita video ham e’tibor markazida: birida bokschi Hasanboy Do‘smatov chechen politsiyasi boshliqlaridan birini bir urib, nokaut qilgani taxmin qilingandi, lekin videodagi mushtumzo‘r Hasanboy emas ekan; ikkinchi video esa, afsuski, o‘zbeklar va qirg‘izlar mushtlashuvi haqida. Qani endi shunday voqealar umuman bo‘lmasa!..
Fojialar. Buxoroda yuz bergan YTH oqibatida er-xotin vafot etdi, Rossiyaning Orenburgida sodir bo‘lgan avariya esa to‘rt o‘zbekistonlikni hayotdan olib ketdi. Rossiyaga ishlash uchun kelganiga endi besh kun bo‘lgan yana bir o‘zbekistonlik is gazidan bo‘g‘ilib o‘lgan bo‘lsa, Andijon va Toshkent viloyatlarida bir kunda olti kishi is gazidan zaharlandi (ne baxtki, ularning hayotini saqlab qolishga muvaffaq bo‘lingan). Samarqandda esa bir tadbirkor sheriklari bilan birga boshqa bir tadbirkorni o‘ldirib qo‘ydi.
Prezident oilasining ijtimoiy tarmoqlardagi eng faol vakili — Shavkat Mirziyoyevning kenja kuyovi Otabek Umarov bugun jamoatchilik uchun yana bir ma’lumotni ulashdi: bojasi Oybek Tursunov 24-noyabr kuni tavallud kunini nishonladi (to‘ng‘ich kuyov necha yoshga to‘lgani ma’lum emas). Avvalroq, 4-noyabr kuni Otabek Umarov bojasining rafiqasi Saida Mirziyoyevani, 8-avgust kuni o‘z rafiqasi Shahnoza Mirziyoyevani, 1-avgustda o‘z onasini tavallud kunlari bilan qutlagan edi. 28-oktabrda esa oila qurganliklariga 12 yil to‘lgani munosabati bilan Otabek Umarov va Shahnoza Mirziyoyeva bir-birlarini tabriklashgan edi (aytmoqchi, Otabek Umarov 17-sentabrda to‘ng‘ich qizi Ma’rifatxonni 11 yoshga to‘lgani bilan, 29-oktabrda esa kenja qizi Raniyani ham tug‘ilgan bilan kuni tabriklagan).
O‘zbekistonda yana nima yangiliklar? Dollarning so‘mga nisbatan rasmiy kursi pasaydi. 2019-yilning to‘qqiz oyida salkam 14 ming o‘zbekistonlik Rossiya fuqaroligini oldi. Senat Samarqand shahri va tumani chegarasi o‘zgartirishga doir hujjatni qabul qiladi. Yunusoboddan deputatlikka nomzod Sergeli tumanining nomini o‘zgartirishni taklif qildi. Andijon viloyatiga yangi bosh imom-xatib tayinlandi. O‘zbekiston Osiyodagi eng boy tarixiy merosga ega mamlakat deb tan olindi, aftidan, shu bois shekilli, Race Across the World realiti-shousining navbatdagi epizodlari aynan O‘zbekistonda tasvirga olinmoqda. Va yana bir qiziq xabar — “Paxtakor” stadioni buziladi va uning o‘rnida yangisi quriladi. Buzilmagan yana nima qoldi o‘zi Toshkentda?
Jahonda-chi? Shifokorlar Assanj turmada o‘lishi mumkinligidan xavotirda. AQSh senatori armanlar ommaviy qirg‘ini haqidagi rezolyutsiya bloklanganini ma’lum qildi. Gonkongda tuman kengashlariga saylovlarda muxolifat qariyb 90 foiz ovoz oldi. Kongoda samolyot qulashi oqibatida salkam 30 kishi halok bo‘ldi. Eron hukumati norozilik namoyishlaridagi fitnachilar orasida IShID a’zolari borligini ma’lum qildi.
Izoh (0)