Qozog‘istonning Olmaota shahrida fohishalik bilan shug‘ullanib kelgan O‘zbekiston fuqarolari qo‘lga olindi. Bu haqda mamlakat IIV matbuot xizmati xabar berdi.
Qayd etilishicha, IIO xodimlari tomonidan mehmonxona majmualaridan birida reyd tadbiri o‘tkazilgan. Natijada intim xizmat ko‘rsatayotgan ayollar qo‘lga olingan. Ular orasida 7 nafar O‘zbekiston fuqarosi bo‘lgan.
“Qo‘lga olingan xorijliklar migratsiya qonunchiligini buzganlik uchun jinoiy javobgarlikka tortiladi va Qozog‘istondan chiqarib yuboriladi”, — deyiladi xabarda.
Sentyabr o‘rtalarida Qozog‘istonning Atirau viloyatida 1998-yilda tug‘ilgan singlisini fohishalikka jalb qilgan O‘zbekiston fuqarosi aniqlangan edi. Bir necha kun oldin esa Ichki ishlar vazirligi Interpol Milliy markaziy byurosi xodimlari tomonidan odam savdosi jinoyatida gumon qilinayotgan ayol Maskatdan Toshkentga olib kelingandi.
Fohishalikka yuborish holatlari
Aprel oyida IIV Tezkor qidiruv departamenti tomonidan ayollarni xorijiy valyutada baholab, intim xizmatlar ko‘rsatish uchun sharoit yaratib bergan hamda yosh qizlarni chet mamlakatlarga olib borib, tazyiq va zo‘ravonlik ostida majburan shahvoniy ekspluatatsiya qilib kelgan guruhlar faoliyatiga chek qo‘yilgandi.
Shuningdek, Toshkent viloyatida qizlarni Indoneziyaga fohishalikka yubormoqchi bo‘lganlar qamalgani to‘g‘risida xabar berilgandi. Shuningdek, Samarqandda 29 yoshli fuqaroni Dubayga fohishalikka yuborayotgan ayol ushlangani, Interpol odam savdosi bo‘yicha qidiruvda bo‘lgan ayolni BAAdan O‘zbekistonga deportatsiya qilgani ma’lum bo‘lgandi.
Izoh (0)