IIV Tezkor-qidiruv departamenti tomonidan ayollarni xorijiy valyutada baholab, intim xizmatlar ko‘rsatish uchun sharoit yaratib bergan hamda yosh qizlarni chet mamlakatlarga olib borib, tazyiq va zo‘ravonlik ostida majburan shahvoniy ekspluatatsiya qilib kelgan guruhlar faoliyatiga chek qo‘yildi. Bu haqda IIV matbuot xizmati xabar berdi.
Qayd etilishicha, 7-mart kuni Tezkor-qidiruv departamenti Jinoyat-qidiruv xizmati xodimlari tomonidan tezkor tadbir o‘tkazilgan. Tadbir davomida 3,2 ming dollar evaziga Bo‘stonliq tumanidagi dala hovlilardan biriga mijoz bilan jinsiy aloqa qilish uchun qo‘l ostidagi qizlardan 5 nafarini olib kelib berayotgan jinoiy guruh qo‘lga olingan.
Shuningdek, 28-mart kuni o‘tkazilgan tadbirda esa kuzatuvda bo‘lgan yana bir guruh ikki ayolni Rossiyaning Qozon shahriga fohishalikda ishlatish uchun Farg‘ona xalqaro aeroporti orqali yuborayotganida ushlangan.
4-aprel kuni bo‘lsa, Toshkent va Xorazm viloyatlarida yashovchi ikki nafar qizni Dubayga yuborayotgan jinoiy guruh a’zolari qo‘lga olingan.
Hozirda ushbu guruhlar tomonidan shahvoniy ekspluatatsiya qilish maqsadida olib ketilgan boshqa qizlarning shaxsini aniqlashga doir tadbirlar davom etmoqda. Aniqlangan holatlar bo‘yicha jinoyat ishlari qo‘zg‘atilgan.
Avvalroq Toshkent viloyatida qizlarni Indoneziyaga fohishalikka yubormoqchi bo‘lganlar qamalgani to‘g‘risida xabar berilgandi. Shuningdek, Samarqandda 29 yoshli fuqaroni Dubayga fohishalikka yuborayotgan ayol ushlangani, Interpol odam savdosi bo‘yicha qidiruvda bo‘lgan ayolni BAAdan O‘zbekistonga deportatsiya qilgani ma’lum bo‘lgandi.
Izoh (0)