Madaniyat vaziri Ozodbek Nazarbekov yana reklama roligida suratga tushib, yoshlarga Kokand University xususiy OTMga o‘qishga kirishni tavsiya qildi. Vazirning matbuot kotibi Sirojiddin O‘sarov bu video reklama emas, balki ijtimoiy foydali ma’lumot ekanini bildirdi.
“Mazkur videorolikni suratga olish jarayonida davlatimiz rahbari tomonidan mamlakatimizdagi yoshlar uchun yaratilayotgan sharoitlar, ta’lim jarayoni va yaratilgan imkoniyatlari yuzasidan madaniyat vaziri Ozodbek Nazarbekov bildirgan fikr va mulohazalariga nisbatan O‘zbekiston Respublikasining ‘Reklama to‘g‘risida’gi qonuni tatbiq etilmaydi degan xulosaga kelingan va videorolik nodavlat oliy ta’lim muassasasining ijtimoiy tarmoqlariga joylashtirilgan”, deyiladi munosabatda.
Sirojiddin O‘sarovning bildirishicha, “Reklama to‘g‘risida”gi qonunning 5-moddasida reklamaning aylanishi sohasida ishlar hamda xizmatlarni bajarish bilan bog‘liq faoliyat reklamaga oid faoliyat ekani ko‘rsatib o‘tilgan. Shuningdek, Fuqarolik kodeksining 108-moddasiga asosan yuridik shaxslarning o‘zaro va fuqarolar bilan bitimlar oddiy yozma shaklda tuzilishi belgilab qo‘yilgan. Madaniyat vazirligi yoki vazir Ozodbek Nazarbekov hamda Kokand University mas’uliyati cheklangan jamiyati reklamaning aylanishi sohasida ishlar va xizmatlarni bajarish bilan bog‘liq shartnomalar rasmiylashtirilmagan.
“Madaniyat vaziri Ozodbek Nazarbekov tomonidan bildirilgan fikr va mulohazalar ilm-fanga uzviy ravishda uyg‘unlashtirilgan va maqsadi daromad olishga qaratilmagan ijtimoiy foydali axborot ekanini ma’lum qilamiz”, deydi Sirojiddin O‘sarov.
Bu Ozodbek Nazarbekovning reklamada ilk bor paydo bo‘lishi emas. 2024-yilda vazir erkaklar kiyimlari do‘koni reklamasida ko‘rinish bergandi. O‘shanda bu holat bahs-munozaralarga sabab bo‘lgan va vazir matbuot xizmati u moddiy manfaat ko‘zlamaganini aytgandi. Raqobatni rivojlantirish va iste’molchilar huquqlarini himoya qilish qo‘mitasi tekshiruv o‘tkazib, “Reklama to‘g‘risidagi” qonunning 16-moddasini buzgan deb topib, do‘konni jarimaga tortgandi.
Izoh (0)