“Real” futbolchilari klub rahbariyatidan Rodrigoni sotmaslikni talab qilmoqda

Madridning “Real” klubi braziliyalik vinger Rodrigo bilan xayrlashish fikridan qaytishi mumkin. Bu haqda TBR Football nashri xabar bermoqda.

Manbaga ko‘ra, “qaymoqranglilar”ning ikki yulduzi — Kilian Mbappe va Vinisius Junior klub rahbariyatiga murojaat qilib, Rodrigoning transfer qilinmasligini so‘rashgan. Ularning fikricha, Rodrigo jamoaning asosiy o‘yinchilaridan biri hisoblanadi va klubning barcha musobaqalarda chempion bo‘lishi uchun Rodrigoning yordami tegishi mumkin.

Shuningdek, Federiko Valverde va Jude Bellingem kabi yarim himoyachilar ham bosh murabbiy Xabi Alonsoga Rodrigoni saqlab qolish zarurligini bildirgan.

Avvalroq Rodrigoga bir nechta Angliya Premyer Ligasi klublari, xususan “Arsenal” va “Liverpul” jiddiy qiziqayotgani haqida xabarlar tarqalgan edi. Hatto futbolchining agenti Pini Zahavi Londonga uchib ketgani va u yerda ushbu klublar vakillari bilan muzokaralar o‘tkazishi mumkinligi aytilgan edi.

• Rodrigo 2019-yildan buyon “Real” safida harakat qilib kelmoqda.
• U klub tarkibida 270 ta o‘yinda maydonga tushib, o‘z hisobiga 68 ta gol va 51 ta golli uzatma yozdirib qo‘ygan.
• Transfermarkt portali futbolchining qiymatini 90 million yevroga baholamoqda.