Ayollarni shahvoniy ekspluatatsiya qilish maqsadida Rossiyaga yuborayotgan ayol Namangan xalqaro aeroportida qo‘lga olindi. Bu haqda IIV axborot xizmati xabar berdi.
Qayd etilishicha, Namangan viloyati IIB Tezkor-qidiruv xizmati tomonidan Farg‘ona viloyatida yashovchi, muqaddam “odam savdosi” bilan sudlangan ayol shahvoniy maqsadlarda foydalanish uchun aldov yo‘li bilan ayollarni yollab, Moskvadagi tanishi “Alyona” oldiga yuborishi to‘g‘risida olingan ma’lumotga asosan tezkor tadbir o‘tkazilgan.
Tadbir davomida ma’lumotda nomi keltirilgan ayol Namangan shahri, Kosonsoy va Uchqo‘rg‘on tumanlarida yashovchi 3 nafar qiz-ayolga o‘z hisobidan aviachiptalarni rasmiylashtirib, 16-aprel kuni Namangan xalqaro aeroporti orqali ularni jo‘natib yubormoqchi bo‘lgan vaqtida ushlangan.
Tergovga qadar tekshiruv harakatlari mobaynida yana ikki nafar ayolni yuborish maqsadida pasportlar hamda aviachiptalarni rasmiylashtirish uchun hujjatlar to‘plagani aniqlangan.
Ushbu ayolga nisbatan Namangan IIO FMB huzuridagi Tergov bo‘limi tomonidan Jinoyat kodeksining 135-moddasi (odam savdosi) bilan jinoyat ishi qo‘zg‘atilib, hozirda tergov harakatlari olib borilmoqda.
Odam savdosi
Toshkent viloyatida qizlarni Indoneziyaga fohishalikka yubormoqchi bo‘lganlar qamalgani to‘g‘risida xabar berilgandi. Shuningdek, Samarqandda 29 yoshli fuqaroni Dubayga fohishalikka yuborayotgan ayol ushlangani, Interpol odam savdosi bo‘yicha qidiruvda bo‘lgan ayolni BAAdan O‘zbekistonga deportatsiya qilgani ma’lum bo‘lgandi.
Aprel o‘rtalarida esa IIV Tezkor-qidiruv departamenti tomonidan ayollarni xorijiy valyutada baholab, intim xizmatlar ko‘rsatish uchun sharoit yaratib bergan hamda yosh qizlarni chet mamlakatlarga olib borib, tazyiq va zo‘ravonlik ostida majburan shahvoniy ekspluatatsiya qilib kelgan guruhlar faoliyatiga chek qo‘yilgan edi.
Izoh (0)