Buxoroda qizlarni fohishalik bilan shug‘ullanishi uchun chet elga yuborib kelgan ayol qo‘lga olindi. Bu haqda “Markaziy studiya” informatsion dasturida ma’lum qilindi.
Jabrlanuvchilardan birining so‘zlariga ko‘ra, u ayolga ish qidirib yurgani, eridan ajrashganini aytgan. Shunda ayol fohishalik evaziga chipta va viza olib berishini bildirgan. U o‘zining bir nechta sheriklari bilan jinoiy til biriktirib, qizlarni Turkiya hududida shahvoniy maqsadlarda foydalanish uchun yo‘llagan.
Ayol qizlarga 500 dollar berib, moddiy jihatdan qaram qilib qo‘ygan, aviachipta va boshqa sarf-xarajatlar o‘z hisobidan bo‘lib, ular keyinchalik qoplab berilishi kerak edi. Qizlar Turkiyaga borganidan keyin fohishalik qilib ishlab berish sharti bilan ularga 5 ming dollar qarzdorlik yuklab qo‘ygan.
Olingan tezkor ma’lumotlar asosida Buxoro viloyati huquqni muhofaza qiluvchi organ xodimlari tomonidan ushbu jinoiy guruh faoliyati ustidan jiddiy kuzatuv olib borilgan. Qizlarni Buxoro—Istanbul yo‘nalishidagi aviareys orqali olib ketishni reja qilgan ayol Buxoro xalqaro aeroportida qo‘lga olingan.
Jinoyat ishlari bo‘yicha Buxoro tuman sudida ko‘rib chiqilgan sud davomida ayolga 5 yil ozodlikdan mahrum qilish jazosi tayinlandi. Uning sheriklaridan biriga esa 4 yil ozodlikni cheklash jazosi belgilandi.
Fohishalikka yuborish holatlari
Aprel oyida IIV Tezkor-qidiruv departamenti tomonidan ayollarni xorijiy valyutada baholab, intim xizmatlar ko‘rsatish uchun sharoit yaratib bergan hamda yosh qizlarni chet mamlakatlarga olib borib, tazyiq va zo‘ravonlik ostida majburan shahvoniy ekspluatatsiya qilib kelgan guruhlar faoliyatiga chek qo‘yilgandi.
Shuningdek, Toshkent viloyatida qizlarni Indoneziyaga fohishalikka yubormoqchi bo‘lganlar qamalgani to‘g‘risida xabar berilgandi. Shuningdek, Samarqandda 29 yoshli fuqaroni Dubayga fohishalikka yuborayotgan ayol ushlangani, Interpol odam savdosi bo‘yicha qidiruvda bo‘lgan ayolni BAAdan O‘zbekistonga deportatsiya qilgani ma’lum bo‘lgandi.
Izoh (0)