Qozog‘istonning Olmaota shahrida o‘tkazilgan tezkor tadbirlar davomida fohishalik bilan shug‘ullanib kelgan O‘zbekiston va Qirg‘iziston fuqarolari qo‘lga olindi. Bu haqda Olmaota politsiyasi xabar berdi.
Ma’lum qilinishicha, Olmaotada o‘tkazilgan tezkor tadbirda shahardagi mehmonxonalarning birida intim xizmat ko‘rsatish bilan shug‘ullanib kelgan 11 nafar ayol aniqlangan. Ularning to‘rt nafari 1997, 2000 va 2003-yilda tug‘ilgan O‘zbekiston va Qirg‘iziston fuqarolaridir.
Huquqbuzarlar Atirau tumani ichki ishlar bo‘limiga olib borilgan. Mehmonxonada qo‘lga olingan ayollarning olti nafariga nisbatan ma’muriy bayonnoma rasmiylashtirilgan. Mehmonxona egasi esa javobgarlikka tortilgan.
Sentyabr o‘rtalarida Qozog‘istonning Atirau viloyatida 1998-yilda tug‘ilgan singlisini fohishalikka jalb qilgan O‘zbekiston fuqarosi aniqlangan edi. Bir necha kun oldin esa Ichki ishlar vazirligi Interpol Milliy markaziy byurosi xodimlari tomonidan odam savdosi jinoyatida gumon qilinayotgan ayol Maskatdan Toshkentga olib kelingandi.
Fohishalikka yuborish holatlari
Aprel oyida IIV Tezkor qidiruv departamenti tomonidan ayollarni xorijiy valyutada baholab, intim xizmatlar ko‘rsatish uchun sharoit yaratib bergan hamda yosh qizlarni chet mamlakatlarga olib borib, tazyiq va zo‘ravonlik ostida majburan shahvoniy ekspluatatsiya qilib kelgan guruhlar faoliyatiga chek qo‘yilgandi.
Shuningdek, Toshkent viloyatida qizlarni Indoneziyaga fohishalikka yubormoqchi bo‘lganlar qamalgani to‘g‘risida xabar berilgandi. Samarqandda 29 yoshli fuqaroni Dubayga fohishalikka yuborayotgan ayol ushlangani, Interpol odam savdosi bo‘yicha qidiruvda bo‘lgan ayolni BAAdan O‘zbekistonga deportatsiya qilgani ma’lum bo‘lgandi.
Izoh (0)