Suriya jiddiy qadrsizlangan milliy valyutaga ishonchni tiklash maqsadida yangi banknotalar chiqarib, ulardan ikkita nolni olib tashlamoqchi. Bu haqda Reuters xabar berdi.
Bu qadam 14 yil davom etgan urush va 2024-yil dekabrida prezident Bashar Asad ag‘darilishidan keyin rekord darajada qadrsizlangan Suriya funtini kuchaytirishga qaratilgan. 2011-yilda urush boshlangach, Suriya funti o‘z qiymatining 99 foizidan ko‘prog‘ini yo‘qotdi. Hozirgi kurs bir AQSH dollariga qariyb 10 ming funtni tashkil etmoqda. Urushdan avval esa bu ko‘rsatkich 50 funt atrofida edi.
Qadrsizlanish kundalik savdo va pul o‘tkazmalarini tobora mushkul qilmoqda. Hozir odamlar bir haftalik oziq-ovqat xaridlarini qora paketlarda, kamida yarim kilo keladigan 5 ming funtlik kupyuralar bilan amalga oshirishga majbur — bu eng yirik nominallik banknota hisoblanadi.
Tranzaksiyalarni yengillashtirish maqsadida Suriya Markaziy banki avgust oyida xususiy banklarga “ikkita nolni olib tashlash” orqali yangi valyuta chiqarishni rejalayotganini bildirgan.
Reuters’ga ko‘ra, beshta tijorat bankiri, Markaziy bankning bir manbasi va suriyalik iqtisodiy amaldor bu ma’lumotni tasdiqlagan. Biroq qaror rasman e’lon qilinmagani sababli ular anonim qolishni so‘ragan.
Funtni qayta baholash uchun qonunchilik tasdig‘i talab etiladimi-yo‘qmi, hozircha noma’lum. Suriya sentyabr oyida yangi qonunchilik assambleyasini shakllantirish uchun ilk saylovlarni o‘tkazishi kutilmoqda.
Xabarlarga ko‘ra, Suriya Rossiyaning davlatga qarashli “Goznak” pul bosmaxonasi bilan yangi banknotlarni chop etish bo‘yicha kelishuvga erishgan. Iyul oxirida Suriyaning yuqori martabali delegatsiyasi Moskvaga tashrif buyurganida shartnoma yakunlangan. Asad davrida ham Suriya valyutasini chop etgan “Goznak” xabarga izoh berishdan bosh tortgan.
Izoh (0)