Prezident administratsiyasi Axborot siyosati departamentining sobiq rahbari Komil Allamjonov va Istiqbolli loyihalar agentligi direktori Dmitriy Li hayotiga suiqasd buyurtmasini kimlar bajargani maʼlum bo‘ldi. Bu haqda Vzglyad.uz va Lenta.ru nashrlari o‘z manbalariga tayanib xabar berdi.
Qayd etilishicha, suiqasd ijrochilari Bislan Rasayev hamda Shamil Temirxanov. Ular Chechenistonda yashaydigan ikki Rossiya fuqarosi ekani aniqlanib, Interpol qidiruviga berilgan.
Jinoyatchilar Komil Allamjonov va Dmitriy Lini o‘ldirish buyurtmasini bajarish maqsadida O‘zbekiston va Qirg‘iziston chegaralarini noqonuniy kesib o‘tgan. Suiqasd ishi uchun ularga 1,5 million AQSH dollari vaʼda qilingan.
Hozirga qadar O‘zbekiston huquqni muhofaza qilish organlari Rasayev va Temirxonov bo‘yicha rasmiy axborot bergani yo‘q.
Maʼlumot uchun, Dmitriy Li 2017-2022-yillarda Prezident huzuridagi Loyiha boshqaruvi milliy agentligida rahbarlik lavozimlarida faoliyat yuritgan. 2022-yilda Istiqbolli loyihalar agentligi direktori lavozimiga tayinlangan.
Komil Allamjonovga uyushtirilgan suiqasd
26-oktyabr tunda Prezident administratsiyasi Axborot siyosati departamenti sobiq rahbari Komil Allamjonovga qurolli hujum uyushtirilgani haqida xabarlar tarqaldi. Bosh prokuratura bergan maʼlumotga ko‘ra, fuqaro S.S. boshqaruvidagi Range Rover rusumli avtomashina Qibray tumani, Ifor ko‘chasi bo‘ylab harakatlangan vaqtida ikki nafar nomaʼlum shaxs mashinaga o‘qotar quroldan bir necha marotaba o‘q uzib, nomaʼlum tomonga yashiringan.
Holat yuzasidan Jinoyat kodeksining 25, 97-moddasi (qasddan odam o‘ldirishga suiqasd qilish) bilan jinoyat ishi qo‘zg‘atildi. Maʼlumot uchun, ushbu holatda jinoyat sodir etgan shaxslar 15 yildan 25 yilgacha bo‘lgan muddatda ozodlikdan mahrum qilish orqali jazolanishi mumkin.
27-oktyabr kuni ushbu jinoyatni sodir etgan shaxslarning biri aniqlanib, gumonlanuvchi tariqasida ushlandi. 28-oktyabr kuni yana uch nafar gumonlanuvchi ushlandi. Noyabr oyida esa suiqasdda gumonlanib yana 5 kishi qamoqqa olingan.
Komil Allamjonov 2024-yil 30-sentyabrda Prezident administratsiyasi Axborot siyosati departamentining rahbari lavozimini tark etgan edi. U faoliyatini xususiy sektorda davom ettirishini maʼlum qilgan.
Izoh (0)