Eron hukumati 9-avgust kuni “Hizbulloh” jangari harakatining qurolsizlantirilishiga qarshi ekanini ma’lum qildi. Bu haqda mamlakat oliy rahnamosi Oyatulloh Ali Xominaiyning xalqaro masalalar bo‘yicha maslahatchisi Ali Akbar Valoyati bayonot berdi.
“Eron Islom Respublikasi ‘Hizbulloh’ning qurolsizlantirilishiga qat’iyan qarshi. Eron doim Livan xalqi va qarshilik harakatini qo‘llab-quvvatlab kelgan va bu yondashuv davom etadi”, dedi Valoyati.
Oldinroq Livan hukumati “Hizbulloh”ni qurolsizlantirish haqida qaror chiqargani ma’lum qilingandi. Unga ko‘ra, mamlakat armiyasiga yil oxirigacha harakatning harbiy qudratini kamaytirish va barcha qurollarni davlat nazoratiga o‘tkazish bo‘yicha reja tuzish topshirig‘i berilgan.
Hukumat bunday choralarni Isroil va “Hizbulloh” o‘rtasida bo‘lib o‘tgan so‘nggi to‘qnashuvdan so‘ng qabul qilgan. Bundan maqsad harakatning siyosiy ta’siri va harbiy kuchini sezilarli darajada kamaytirishdan iborat.
AQSH va Isroil aralashuvi
Valoyatining ta’kidlashicha, qurolsizlantirish tashabbusi AQSH va Isroilning aralashuvi natijasi bo‘lib, Livanda avval ham shunga o‘xshash rejalar bo‘lgan, ammo ular muvaffaqiyatsizlikka uchragan.
“Bu kabi Livanga qarshi rejalar ilgari ham ishlab chiqilgan. Ular qanday amalga oshmagan bo‘lsa, bu ham xuddi shunday natija bermaydi. Qarshilik harakati o‘z pozitsiyasida sobit qoladi”, dedi Valoyati.
“Hizbulloh” qurolsizlantirishni “katta gunoh” sifatida baholadi
“Hizbulloh” o‘zining rasmiy bayonotida Livan hukumatining bu qarorini “og‘ir xato va katta gunoh” deb ta’riflab, bu “hech qachon bo‘lmagan” deb hisoblanishini bildirgan. Eron tashqi ishlar vaziri o‘rinbosari Abbos Aroqchi vaziyatga shunday munosabat bildirgan:
“Qurolsizlanish borasida qarorni ‘Hizbulloh’ning o‘zi qabul qiladi. Eron masofadan turib qo‘llab-quvvatlaydi, ammo aralashmaydi”.
Ma’lumot uchun, “Hizbulloh” Eronning “qarshilik o‘qi” — mintaqadagi qurolli guruhlar tarmog‘ining bir qismi bo‘lib, G‘azodagi HAMAS va Yamanning husiy jangarilari Isroilga qarshi kurashda birlashgan. Sobiq prezident Bashar Asad boshchiligidagi Suriya ham zanjirning asosiy bo‘g‘ini hisoblanardi. Lekin Asadning 2024-yil dekabrda hokimiyatdan chetlatilishi mintaqadagi vaziyatni o‘zgartirib yuborgan.
Izoh (0)