Toshkent viloyati Quyi Chirchiq tumanida noqonuniy chiqindixona tashkil etgan fuqaro salkam 4 yilga ozodlikdan mahrum qilindi. Bu haqda Ekologiya vazirligi xabar berdi.
Unga ko‘ra, Toshkent viloyati Quyi Chirchiq tumanida Chirchiq daryosi o‘zanida tuman hokimligi zaxirasida bo‘lgan yer maydonini 2023-yilning may oyidan 2024-yilning yanvar oyiga qadar o‘zboshimchalik bilan egallab olib, hech qanday maxsus ruxsatnomalarga ega bo‘lmasdan, noqonuniy chiqindixona tashkil qilgan huquqbuzarga sud hukmi o‘qildi.
Avvalroq Ekologiya vazirligi davlat inspektorlari tomonidan Chirchiq daryosida navbatdagi reyd tadbirlari olib borilgan edi. Reyd davomida o‘rganish natijasida fuqaro M.D. daryo hududiga chiqindilar to‘kib, to‘g‘on hosil qilgani aniqlangan. Fuqaro bir necha bor ogohlantirilishiga qaramasdan, qurilish chiqindilarini o‘zboshimchalik bilan tashlab ketavergan.
Sudda M.D.ning toifalangan hamda muhofaza etiladigan tabiiy hududlar rejimini buzib, noqonuniy chiqindixona tashkil qilgani, hududga chiqindilarni ma’lum mablag‘ evaziga joylashtirib kelgani o‘z isbotini topdi.
Fuqaro daryoga 126 433,70 kub metr chiqindi tashlangani oqibatida Vazirlar Mahkamasining 2021-yil 12-apreldagi “O‘zbekiston Respublikasi hududida atrof-tabiiy muhitlarni muhofaza qilishning iqtisodiy mexanizmlarini yanada takomillashtirish to‘g‘risida”gi 202-sonli qaroriga asosan hisob-kitob natijalariga ko‘ra, davlat manfaatlariga 3 milliard 68 million 206 ming 171 so‘m miqdorda zarar yetkazgan.
Shuningdek, M.D. “Tabiatni muhofaza qilish to‘g‘risida”gi qonunning 22-moddasi hamda “Muhofaza etiladigan tabiiy hududlar to‘g‘risida”gi qonunning 41-moddasini qo‘pol ravishda buzgan.
Sud Jinoyat kodeksining 59, 61-moddalariga asosan huquqbuzarni 3 yil-u 9 oy muddatga ozodlikdan mahrum qildi. Shuningdek, undan davlat foydasiga 3 milliard 68 million 206 ming 171 so‘m zarar undirilishi belgilandi.
Izoh (0)