Samarqandda qiymati 1 milliard 668 million so‘mlik 117 ming qutidan ziyod sigaret va chilim uchun tamaki mahsulotlari yo‘q qilindi. Bu haqda Bojxona qo‘mitasi axborot xizmati xabar berdi.
Xabarga ko‘ra, Samarqand shahridagi markaziy chiqindi poligonida bojxona organlari tomonidan noqonuniy muomaladan olib qo‘yilgan tamaki mahsulotlarini ommaviy axborot vositalari va keng jamoatchilik vakillari ishtirokida yo‘q qilish tadbiri bo‘lib o‘tdi.
Bojxona qo‘mitasining Samarqand viloyati bojxona boshqarmasi tomonidan tashkil qilingan tadbirda viloyat ekologiya va atrof muhitni muhofaza qilish boshqarmasi, Sanitariya epidemiologik va jamoat salomatligi boshqarmasi, Majburiy ijro bo‘limi vakillari ham ishtirok etdi.
O‘tgan yilning noyabr oyida bojxonachilar tomonidan respublika hududidan tranzit tarzida olib o‘tilishi rejalashtirilgan 114 ming 448 quti sigaret hamda chilim uchun tamaki mahsulotlari Bulung‘ur tumanidagi xonadonlardan biriga tushirib qoldirilgani fosh qilingan edi. Joriy yilning may oyida viloyatda aniqlangan yana bir holatda esa qiymati 48 mln so‘mdan 2760 quti tamaki mahsulotlarining noqonuniy aylanmasiga chek qo‘yilgan edi.
Bugungi tadbirda esa ayni shu ikkala holat yuzasidan sudning tamaki mahsulotlarini yo‘q qilish bo‘yicha qarori ijrosi ta’minlandi. Tadbir davomida tamaki mahsulotlari maxsus texnikalar ko‘magida yanchildi, suvga bo‘ktirildi va yakunda butunlay yaroqsiz holga kelgach, ko‘mib yuborildi.
Izoh (0)