“O‘zbekkosmos” agentligi tomonidan 2024-yilning boshidan buyon ekologiya yo‘nalishida olib borilgan kosmik monitoring natijalariga ko‘ra, respublikaning qariyb 721 gektar maydonida 1 ming 928 ta noqonuniy chiqindixona mavjud ekanligi aniqlandi. Bu haqda agentlik matbuot xizmati xabar berdi.
Maʼlum qilinishicha, ulardan 123 tasi, yaʼni 255,5 gektari chiqindi saqlash poligonlari chegarasidan tashqariga chiqish, 1 805 tasi — 465,2 gektari esa noqonuniy chiqindi poligonlari sifatida qayd etilmoqda.
Xususan, Qoraqalpog‘iston Respublikasida 243 ta (63,2 gektar), Xorazm viloyatida 168 ta (22 gektar), Buxoro viloyatida 92 ta (91,7 gektar), Navoiy viloyatida 216 ta (112,4 gektar), Samarqand viloyatida 147 ta (41,2 gektar), Qashqadaryo viloyati 81 ta (79,3 gektar), Andijon viloyati 180 ta (42 gektar), Namangan viloyatida 195 ta (65,2 gektar), Farg‘ona viloyatida 164 ta (51 gektar), Toshkent viloyatida 363 ta (98,6 gektar), Jizzax viloyatida 39 ta (30,44 gektar) va Surxondaryo viloyatida 40 ta (20,11 gektar).
“Bu kabi noqonuniy chiqindi poligonlarining tashkil etilishi, avvalo, atrof-muhit va ekologiyaga katta salbiy taʼsir o‘tkazib, tuproq, suv va havo sifatiga salbiy taʼsir ko‘rsatishi bilan xavflidir. Qolaversa, zararli hasharotlar ko‘payishi, infeksion kasalliklarning ortishi, insonlarda o‘pka saratoni va nafas olish nuqsonlarining rivojlanishiga olib keladi”, deyiladi xabarda.
Avgust oyi oxirida Toshkent shahrida yil boshidan buyon chiqindi bilan bog‘liq 2000 dan ortiq huquqbuzarlik aniqlangani haqida xabar berilgandi.
Izoh (0)